Ministério Obras Públicas (MOP) apela ba sidadaun Timor-Leste (TL) atu fó kontribuisaun voluntária hodi kuda ai-oan no ai-funan iha estrada publiku, inisiativa ne’e parte husi esforsu governu atu hadia beleza sidade nian.
Ministru ba MOP, Samuel Marçal hateten, programa ne’e sei ajuda fó matak, mahon, no bele transforma sidade nia imajen ne’ebé diak liu, tanba ne’e aprezia sidadaun sira ne’ebé voluntáriu hodi halibur ema seluk atu lori ai-oan, ai-funan, no partisipa iha kuda ai-oan iha fatin ne’ebé governu prepara ona.
“Ita kuda ai iha estrada públiku la’ós, tanba ema ida-ida ho nia interesse rasik. Rai ida ne’e ita hotu nian. Estrada ida-ne’e ema hotu uza, entaun responsabilidade mós koletivu,” Ministru MOP, Samuel Marçal, hateten iha Hotel Timor, Díli.
Nia hatutan, se iha ai-funan iha uma ne’ebé la uza ka la kuda, bele lori mai kuda iha jardin publiku. Inisiativa ne’e presiza hanoin koletivu, no la presiza hela depende de’it ba estadu.
“Buat boot bele husu ba estadu, maibé buat kiik hanesan kuda ai-oan bele ita halo rasik,” nia hatete.
Nia akresenta, apelu ida ne’e la’ós de’it kona-ba kuda ai, maibé mós ba kuidadu, governu husu ba sidadaun atu respeita ai-funan sira ne’ebé iha ona, kuda iha estrada publiku.
“Ita-nia sidade hakarak sai diak no furak, tenke kuidadu ai-oan no kuda ai-funan iha estrada publiku sira atu nune’e bele haree ba rai ne’e matak no buras, no bele atrai turismu,” nia dehan.
Iha fatin ketak, Sekretáriu ba Sekretariadu Estadu no Floresta, Fernandinho Viera hateten, prontu atu apoiu MOP hodi kuda ai-oan iha dalan públiku sira.
“Ita prontu atu apoiu hodi kuda ai-oan iha dalan publiku sira, maibé ita mós tenke hatene maneira kuda ai-oan ne’e oinsa, tanba ita haree sira kuda ai-oan iha dalan públiku, sira la kuidadu, hanesan hali oan sira.
Tuir loos ita atu kuda presiza tau uluk buat ruma ba rai kuak laran ne’e atu nune’e hali abut ne’e labele estraga ba fali estrada, tanba ne’e ita husu para ita koopera atu nune’e tékniku sira bele hatene uluk lai oinsa bele kuda ai-oan ne’e,” nia dehan.
Nia hatutan, ekipa husi floresta nian prontu atu kontribui hodi kuda ai-oan iha dalan públiku sira, tanba ne’e husu atu nafatin iha koordenasaun ba malu.
José da Silva, membru grupu juventude iha Bidau Santana, fó hanoin positivu kona-ba apelu ida ne’e, maibé husu atu governu prepara planu estruturadu no organizadu, atu nune’e sira bele organiza joven sira ba kuda ai-oan iha dalan sira-ne’e.
“Ami kontente katak governu fó espasu ba juventude atu kontribui, maibé la iha orientasaun klaru kona-ba fatin kuda, tempu, no kuandu sei halo. Se governu organiza di’ak, ami joven sira prontu atu ajuda,” José hateten.Nia haktuir, envolvimentu juventude iha atividade hanesan ne’e bele ajuda tau liman ba responsabilidade sívika no konsientizasaun ambientál ni’an.
