Administradór Postu-Administrativu (APA) iha Balibo, Munisípiu Bobonaro, propoin ba Sekretaria Estadu Komunikasaun Soial (SECOMS) atu harii Sentru Formasaun Jornalista iha fatin istórika Balibo.
APA-Balibo Casamiro dos Santos hateten, inisiativa ne’e eziste iha ambisaun atu transforma Balibo hanesan sentru aprendizajen profisionál iha área komunikasaun no jornalizmu iha nivel nasional.
“Hanoin ida-ne’e atu fó oportunidade ba juventude no jornalista sira foun, liuhusi formasaun prátiku kona-ba téknika audiovisual, étika profisionál, no lideransa komunikativu, objetivu prinsipal mak atu “revive” espíritu Balibo hanesan fatin istóriku média, ne’ebé iha ligasaun boot ho sakrifísiu jornalista internasionál sira iha tinan 1975,” dehan APA Balibo Santos, iha serimónia inagurasaun Rádio Comunidade Fronteira Balibo Five, iha Balibo.
Santos dehan, husu ba SECOMS harii netik fatin formasaun jornalismu iha fatin ne’e, atu nune’e bele kapasita di’ak liu tan joven sira iha área jornalismu nian. Balibo la’ós de’it fatin istoriku, maibé bele sai aprendizajen ba jerasaun jornalista sira iha Timor-Leste. Sentru ida ne’e sei fó espasu atu partilla esperiénsia, treinu kapasidade, no estimula jornalista atu servisu ho profisionálismu.
“Atu kontinua istória jornalista na’in-lima ne’ebé mate iha Balibo iha tempu okupasaun Indonesia, presiza iha fatin ida atu nune’e bele fasilita joven sira oinsá bele hatene knaar jornalista nian. Tanba ne’e ita husu atu loke mós formasaun jornalismu iha fatin ida-ne’e.
Rádiu Komunidade Fronteira Balibo iha ona, ajuda ona komunidade sira oinsá atu bele hato’o sira-nia preokupasaun ba governu liuhusi radiu ida ne’e, maibé tenke fó formasaun ba jornalista área refere, atu nune’e sira bele hatene oinsá atu buka informasaun hodi fó sai,” nia dehan.
Iha parte seluk, Sekretariu ba Sekretariadu Estadu Komunikasaun Soisal (SECOMS), Expedito Loro Dias Ximenes hatete, iha sinal pozitiva no konfirma katak sei analiza proposta ne’e, tanba konkorda ho ideia atu integra formasaun kapasidade profisionál ho dezenvolvimentu iha komunidade.
“Rekomendasaun ida ne’ebé ita simu husi Autoridade Balibo nian atu loke sentru formasaun ba jornalista sira iha Balibo, ne’e hanoin ne’ebé di’ak, maibé ita sei tur hamutuk hamutuk ho Konsellu Imprensa oinsá atu bele foti desizaun, tanba Konselu Imprensa mak hanesan reguladór média nian, tanba ne’e ita sei tur hamutuk, hodi deside hamutuk antes atu harii,” nia esplika.
Nia afirma, jornalista sira bele sai parte importante iha valorizasaun produtivu komunidade liuhusi komunikasaun efetivu no promosaun produtu lokal, tanba ne’e sentru formasaun ba jornalista sira ne’e importa duni, maibé SECOMS no KI sei tur hamutuk hodi deside.
Konsellu Imprensa (KI) António M. C. M. Mali hateten, formasaun ida hanesan ne’e sei ajuda jornalista atu aprende oinsá uza média nu’udar meiu edukativu no promosaun dezenvolvimentu sosial.
“Autoridade Postu Administrativu Balibo mós husu atu loke sentru formasaun jornalismu iha fatin ida ne’e atu oinsá bele kapasita jornalista di’ak liu tan iha futuru.
Hanoin ida-ne’e ami sei tau iha ami-nia planu para oinsá atu realiza formasaun, hanesan Autoridade Postu Administrativu husu atu bele iha tan formasaun kontinua ba jornalista sira iha radio komunidade Fronteira Balibo 5 nian,” nia afirma. Nia salienta, inisiativa ne’e fó esperansa katak Balibo, fatin ne’ebé iha signifikadu profundu ba istória jornalista sira iha Timor-Leste, sei bele hetan vida foun hodi aumenta koñsimentu ida ne’ebé inspira jerasaun jornalista Timor oan sira iha futuru.
