Governu liuhusi Sekretáriu Estadu Formasaun Profesional no Empregu (SEFOPE) husu traballadór Timoroan iha Austrália no Korea tenke kria negósiu rasik hodi fó fali servisu ba foinsa’e sira seluk iha Timor-Leste.
Xefe Departamentu Deslokasaun iha SEFOPE Alarico Rernandes dehan, Timoroan sira ne’ebé servisu iha Austrália no Korea ne’e reprezenta estadu ho objetivu katak atu buka empregu hodi rezolve dezempregu iha rai-laran.
“Governu husu traballadór Timoroan iha Austrália no Korea tenke kria negósiu nune’e hodi fó servisu ba foin-sa’e sira iha rai-laran tuir juramentu ne’ebé iha halo molok desloka ba servisu,” nia hatete.
Nia hatete, iha sira-nia juramentu reprezenta nasaun no povu la reprezenta família, tanba idaidak iha responsabilidade hodi kria kampu servisu iha rai ida ne’e.
“Estadu nia esperansa atu imi bele buka empregu hodi kria empregu ba jovem sira seluk hodi kontribui ba dezenvoliventu nasaun nian,” Xefe Departamentu Deslokasaun Fernandes informa iha serimónia despedida ho traballadór Timoroan hamutuk 61 hodi ba servisu iha Austrália.
Nia dehan, lori estadu nia naran husu traballadór sira servisu ho responsablidade, tanba sira mós hanesan embaixador ekonomia iha ema nia rain.
Iha fatin hanesan, traballadora Maria Ximenes dehan, sira ba servisu iha Austrália ne’e liuhusi esforsu ne’ebé mak estadu no governu halo hodi fasilita Timoroan sira asesu ba servisu.
“Ami servisu tuir responsabilidade ne’ebé ami iha liga mós ba juramentu ne’ebé ami halo ona, tanba ne’e ami sei servisu ho di’ak nune’e bele kria kampu servisu ba maluk sira seluk iha Timor-Leste,” nia dehan.
Nia dehan, durante ne’e iha ona maluk traballadór balun husi Austrália no Korea ne’ebé konsegue halo ona negósiu sira hanesan loke kafétaria no butik hodi fó servisu ba ema seluk.
“Ha’u promete husi rezultadu servisu ne’ebé iha sei kria mós servisu ba ema seluk iha Timor-Leste,” nia informa.Nia hatete, husu ba maluk traballadór Timoroan sira atu servisu ho di’ak hodi kumpri kumprimisiu no responsabilidade ba dezenvolvimentu rai doben Timor-Leste.
