Prezidente Autoridade Protesaun Sivíl (APC) Jesuíno dos Reis Matos Carvalho dehan, komunidade tenke prepara ai-han lokál hanesan fehuk, aifarina, talas no seluk hodi hasoru tempu bailoron naruk no inundasaun, ka kalimidade sira seluk ne’ebe sei afeta sira no to’o iha situasaun ne’e komunidade iha ona stok ai-han rasik hodi bele tahan.
“Ita husu komunidade sira tenke konserva ai-han produtu lokál sira, hodi antisipa ba kalamidade ne’ebé liga ho bailoron naruk no inundasaun,” nia hatete.
Nia salienta katak maske governu mós prepara stok iha armajen, maibé governu mós hakarak eduka komunidade oinsa atu prepara ai-han rasik hodi ladepende deit ba governu.
“Dadaun ne’e ita-nia stok iha armajen preparadu ona, hodi halo antisipasaun karik akontese kalamidade hodi apoiu ba vitíma sira,” Prezidente APC Matos informa.
Alende ne’e nia dehan, governu eduka komunidade hodi konserva produtu lokál, governu mós eduka komunidade oinsa halo prevensaun ba risku dezastre hahu husi nasionál to’o munisípiu sira.
Entretantu, Xefe Departamentu Asuntu Sosial, iha Munisípiu Viqueque Antonio Gergorio dehan, kona-ba prepara ai-han hodi antisipa situasaun emerjénsia sira komunidade Viqueque laiha duvida, tanba maioria moris hanesan agrikultór.
“Ita-nia komunidade sira kada loron konsumu produtu ne’ebé mak sira kuda rasik iha to’os, tanba ne’e ita fiar katak sira kona-ba stok ai-han ba sira karik iha situasaun mudansa klimátika laiha duvida,” nia informa.
Alende ne’e nia dehan, kona-ba prevensaun risku dezastre iha Munisípiu Viqueque durante ne’e menus tebes.
“Maibé foin lalais ne’e ita forma ona ekipa ida oinsa halo sosializasaun ba komunidade kona-ba prevensaun risku dezastre no oinsa komunidade sira bele hado’ok an,” nia hatete.
Iha parte seluk komunidade Juliana da Costa dehan, komunidade sira ne’ebé hela iha munisípiu Viqueque iha ai-han iha armajén preparadu.
“Ami prepara, tanba ami nia to’os mak armajen ne’ebé kompetu ho ai-han oi-oin,” nia hatete.Alende ne’e nia husu ba governu karik bele atu fasilita fini seluk ne’ebé sira laiha hanesan, tipu modo sira nune’e sira bele kuda no prepara ba situasaun kalamidade.
