Konsellu Nasionál Juventude Timor-Leste (CNJTL) observa joven sira moris iha risku nia laran no envolve an iha aktu kriminál presiza formasaun karakter.
“Joven sira ne’ebé komete iha aktu ida-ne’e ita konsidera moris iha risku. Joven hirak ne’e presiza formasaun karakter atu nune’e bele muda sira husi hahalok kriminál hirak ne’e,” Prezidente CNJTL Maria Dady Magno informa.
Nia salienta tan katak tuir monitorizasaun ne’ebé CNJTL halo hatudu katak joven barak mak envolve an iha aktu krime sira inklui tuda malu, naok sasán, asaltu ema iha dalan no seluk tan.
Nia dehan, aktu hirak ne’e akontese tanba ransu livre ho grupu organizadu sira hodi kauza involvimentu joven sira hodi komete hahalok krime.
Nia enfatiza mós katak la ós maioria joven maibe balun deit no sira ne’ebe moris iha risku nia laran.
Nia hatete, presiza mós edukasaun husi família nune’e eskola nia fundasi ba edukasaun ne’e metin.
“Liga ba polítika governu nian ita halo ona formasaun karakter hodi haree joven sira ne’ebé moris iha risku nia laran,” nia informa.
Nia dehan, iha tinan 2025 CNJTL la realiza formasaun karakter ba joven sira, tanba laiha orsamentu, maibé sei esforsu nafatin hodi hasai joven husi risku no prepara ba futuru.
Entretantu, jovem MA dehan, joven ne’ebé mak halo krime ne’e tanba falta kontrolu husi uma laran, oan sai ba ne’ebé de’it inan aman la husu tuir.
“Ita haree inan-aman abandona oan sira, ikus mai oan halo ona krime inan-aman foin hakfodak no maske oan sala ona mós defende dehan oan mak loos,” nia dehan.Nia hatete, hahalok inan aman nia ida defende ne’e mós kuntribui ba aktu kriminál. Tanba ne’e inan-aman tenke eduka oan loloos nune’e bele la’o tuir dalan loos no hado’ok an husi hahalok violénsia.
