Governu liuhusi Ministériu Defeza (MD) sosa ona karreta tátika unidade 18 hodi moderniza ekipamentu Falintil-Forsa Defeza Timor-Leste (F-FDTL).
Ministru ba MD Donaciano Costa Gomes Pedro Klamar Fuik dehan, karreta hirak refere ho marka marka Isuzu Mini-Hicom unidade ualu (8) ho total orsamentu $959.200 husi Orsamentu Jéral Estadu (OJE) 2023 enkuantu karreta ho marka BAIC unidade sanulu (10) hola ho orsamentu$600.000 husi OJE 2025 nian.
“Ita sosa karreta tátika hamutuk unidade sanolu-resin-wlu (18) hodi fasilita modernizasaun servisu F-FDTL nian, maske natoon maibé ita nafatin esforsu,” MD Pedro Klamar Fuik informa.
Nia hatete, karreta hirak ne’e ofrese ona ba Komandu F-FDTL hodi utiliza ba servsiu loron-loron nian hodi servi povu no estadu.
“Karreta sira ne’e distribui ba Komandu Komponente sira no Autoridade Marítima Nasionál hodi halo servisu. Tanba ne’e husu ba Komandu F-FDTL atu iha kontrolu ne’ebé rigorozu aplika ezekusaun regra militar ninian, ne’ebé estabelesidu ona atu nune’e militar sira ne’ebé uza viatura militár bele kumpri,” nia salienta.
Nia husu ba miltar sira atu kuidadu viatura militar ne’ebé governu atribui, uza viatura sira ho responsablidade nune’e utilizasaun bele dura.
Alende ne’e nia apresia ba dezenvolvimentu insitituisaun F-FDTL, tanba iha 2001 bainhira FALITIL transforma aan ba Forsa Defeza Timor-Leste iha Aileu no iha de’it karreta mini-icon ida ne’ebé ho segunda mau.
Nia hatete, tuir lei programasaun militár ne’ebé governu halo iha tinan 2023, kompromete kontinua dezenvolve instituisaun F-FDTL.
“Ita iha planu dezenvolvimentu da forsa ita presiza ba de’it iha transporte viatura de transporte pesoál hamutuk lima-nolu-resin-neen (56) unidade agora ita iha metade ona,” nia salienta.
Iha fatin hanesan, Xefe Estadu Maior Jeneral FALINTIL-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek” agradese ba governu tanba halo tan akizisaun ba viatura militár hodi apoia servisu militár nian.
Nia hatete, militar sira atu hadomi viatura sira hanesan sira-nia an rasik nune’e bele uza ba instituisaun forsa armada.”Husu ba Estadu Maior atu aselera diretiva ba iha utilizasaun transporte militár nune’e bele iha kontrolu di’ak ba viatura militar ne’ebé iha kuandu membru F-FDTL mak la utiliza ho di’ak Komandante sira tenke foti medida,” nia informa.
