Governu Japaun liuhusi JICA (Japan International Cooperation Agency) iha Timor-Leste (TL) apoiu Polísia Nasionál Timor-Leste (PNTL) liu-liu Unidade Polísia Marítima (UPM) ho ró haat (4) hodi dezenvolve servisu kontrolu marítima liuhusi apoiu ró 4 ba UPM.
Diretór Country JICA-TL, Fukumori Daisuke, hatete, JICA nia kompremisiu ba hasa’e monitorizasaun seguransa hodi rezolve di’ak liután, kontrolu atividade ilegál hodi proteje ekonomia TL nain.
“Ró haat ba UPM nune’e bele utiliza ba vizilansia,” nia informa.
Nia dehan, JICA apresia servisu kontrolu UPM nian durante ne’e, hodi halo prevensaun ba atividade ilegál no krime organizadu sira iha marítima maske laiha ró kontrolu ne’ebé di’ak hodi fasilita sira.
Nia informa, Japaun la’os oferese ró haat de’it, maibé sei prepara mós ba manutensaun ba ró ne’ebé oferese atu nune’e hadia efeitu no kapasitasaun ba UPM.
“Ami fiar katak patrullamentu seguransa marítima esensiál ba Timor-Leste nia prosperiedade no estabilidade, tanba fronteira marítima seguru, importante tebes atu proteje soberania nasionál hodi salvaguarda, rekursu tasi nian atu kombate atividade ilegal sira, liu-liu peska ilegal sira no garante seguransa maritima,” nia salienta.
Nia hatete, alende fó ró haat (4) Japaun fó mós formasaun atu oinsa UPM bele deteta peska ilegál sira iha tasi.
Entretantu, Komandante Jerál PNTL, Komisariu Henrique da Costa, dehan, atu dezenvolve vizilánsia iha tasi PNTL servisu parseria ho governu Japaun liu-liu JICA Timor-Leste hodi apoiu dezenvole setór refere.
Nia hatete, fatin atu atraka ró haat (4) ekipa téknika husi JICA survei ona mak Beaço, Kuartel UPM, Lautém no Oe-Cusse.Nia dehan, UPM presiza tebes ró hodi vizilánsia ba atividade peska ilegál. No durante ne’e governu Japaun liuhusi JICA mós apoiu ona buat barak mai iha instituisaun PNTL.
