Prezidente Repúblika Demokrátika Timor-Leste Jose Ramos Horta dehan, governu liuhusi Ministériu Justisa (MJ) presiza dezenvolvimentu setor justisa hodi promove justisa ne’ebé sensivel ba ema hotu.
Nia dehan, dezenvolve liuhusi infraestrutura iha Defensoria Públika ne’ebé antigu no kondisaun ladun di’ak, transporte laiha nune’e mós presiza aumenta ekipamentu.
Nia hatete, área hirak ne’e tenke hadia nune’e defensor sira hodi hala’o sira-nia servisu ho di’ak hodi garante justisa iha Timor-Leste.
“Ha’u husu governu liuhusi Ministériu Justisa presiza tau atensaun hodi dezenvolve setór justisa hodi garante justisa ida ne’ebé sensivel ba ema hotu,” nia informa.
Nia dehan, durante ne’e Defensoria Públika halo sira-nia servisu di’ak tebes maske hasoru difikuldade barak, maibé sira nafatin promove justisa ne’ebé justu.
“Ita hakarak justisa ne’ebé sensivel ba em hotu tenke harii defensoria ida ne’ebé forte kompletu ho materia ba advogadu sira no tenke hadia sira-nia kondisaun,” Prezidente Horta salienta.
Enkuantu nia dehan, Defensoria Públika, durante ne’e ladun hetan atensaun tanba ne’e ba oin governu tenke hadi’a uluk sira-nia infraestrutura.
Entretantu, Ministru Ministériu Justisa (MJ) Sergio de Jesus Fernandes da Costa Hornai dehan, dadaun ne’e governu nia kompromisu hodi apoiu no hametin Defensoria Públika ne’ebé halo nia papel importante asesu ba justisa no harii nasaun ida ne’ebé justu no igualitariu.
“Ita sei garante kualidade servisu di’ak liuhusi kompleta ekipamentu, infraestrutura, no ita buka atu identifika, fallansu iha prosesu sira tantu emternos administrative, tékniku, servisu no protesaun direitu sira,” MJ Hornai informa.
Nia dehan, Defensoria Públika nia knaar atu garante asesu ba justisa liu-liu ba ema sira situasaun vulnerável ekonomi no sosial.
“Funsaun prinsipál atu asegura no defeza ba ema nia direitu umanu no igualdade iha lei nia oin, promove dignidade umana no justisa liuhusi misaun Defensoria Públika nian,” nia salienta.
Nia dehan, MJ nia konfiansa tomak Defensoria Públika sira-nia abilidade hodi hala’o knaar ho firme responsabilidade kompromisu hodi servi povu.
