Membru sira Parlamentu Nasionál husu governu liu-liu Sekretáriu Estadu Toponómia no Organizasaun Urbana (SEATOU) tenke seluk uluk indemnizasaun ba vitíma eviksaun mota-Comoro hamutuk uma-kain 171 ne’ebé hela iha karentina Tasi-Tolu molok haruka sira ba munisípiu orijen.
Deputadu Florentino da Costa “Sinarai” dehan, vitíma eviksaun sira ne’ebé dadaun ne’e hela iha Karentina Tasi-Tolu ne’e governu mak lori ba hela provizóriu hodi hein indemnizasaun.
Nia dehan, bainhira governu fó ona sira nia diréitu depois transporta sira ba kada munisípiu, maibé SEATOU ba obriga komunidade sira tenke sai kedan ba ida-idak nian munisípiu.
“Ita husu governu tenke selu kedas indemnizasaun ba uma-kain 171 ne’e molok sira fila ba munisipíu orijen nune’e sira bele utiliza osan ne’e iha hodi bele halo sira-nia uma no kontinua sira-nian moris,” nia dehan.
Nia hatete, hela iha munisipíu ida mak derepente muda ba hela iha munisípiu seluk ne’e lafasil, tanba ne’e governu tenke trata nia povu ho dignu.
“Ita-nia komunidade sira koopera ona ho governu hodi halo dezenvolvimentu, maibé la utiliza nia responsabilidade loloos hodi servi nia povu ho di’ak,” nia hatete.
Iha fatin hanesan, vitíma Madalena das Neves dehan, sira prontu kopera ho governu fila ba munisípiu, maibé tenke fó uluk indemnizasaun.
“Bainhira governu seidauk fó ami-nia diréitu ami sei la fila no kontinua hela iha karentina. Tanba antes ne’e governu promete ona katak selu tiha mak ami mak sira rasik tula ba ami nia munisípiu,” nia dehan.
Nia dehan, atu sai ho liman mamuk entaun sira sei lasai husi fatin ne’e, tanba laiha osan hodi aluga uma (kos) no lori saida hodi halo uma.
Enkuantu vitíma hirak ne’e sai husi Aldeia Moris-Foun Suku Comoro evakua iha dia 8 Marsu ba toba kalan ida iha Bombeiros depois governu lori sira ba iha karantina.
Entretantu Sekretáriu ba Sekretariadu Estadu Toponómia no Organizasaun Urbana (SEATOU) Geromano Santa Britnes Dias dehan, komunidade hirak ne’e identifika hela iha área risku ba dezastre naturais.”Komunidade ne’ebé hela iha area risku sei la hetan indemnizasaun, maibé governu apoiu de’it hodi transporta ba munisípiu orijen,” nia dehan.
