Polísia Nacional Timor-Leste (PNTL) liuhusi Komandu Polísia Munisípiu Díli (KPMD) identifika ona membru hamutuk na’in rua-nolu (20) mak tama ona ba idade reforma, maibé sei kontinua hala’o knaar hanesan polísia.
Komandante Polísia Munisípiu Díli Superintendente Xefe Orlando Gomes dehan, membru hirak ne’e durante ne’e halo servisu ladun efetivu, tanba kestaun saúde nomós sira idade ona sempre hetanmoras.
“Ita Munisípiu Díli ita identifika ona membru hamutuk na’in 20 mak tama ba idade reforma,” nia dehan.
Nia hatete, lista idade reforma ne’e submete ona ba Komandu Jerál PNTL hodi tau iha atensaun hodi halo tratamentu ba sira.
“Membru na’in 20 ne’e ita labele hapara lai sira-nia servisu maske idade reforma ona, maibé ita husu komandu atu bele apoiu tratamentu saúde ba sira,” Komandante KMD Superintendente Xefe Gomes informa.
Nia hatete, membru sira-ne’e idade ona, ne’e tratamentu ba sira-nia saúde importante, atu nune’e sira bele halo servisu ho efetivu.
“Ita-nia membru sira ne’ebé tama ona iha idade reforma ne’e signifika katak, ita-nia rekursu ne’e menus liu tan, provizóriu ita seidauk iha membru foun ne’ebé atu koloka mai iha Komandu Munisípiu Díli maibé ita uza jestaun ne’ebé iha para nunee bele utiliza rekursu ne’ebé iha hodi halo atedimentu nafatin ba ita-nia komunidade sira,” nia informa.
Nia informa, dadaun ne’e Komandu Díli iha membru hamutuk 480 husi ne’e iha na’in 20 mak tama ba idade reforma.
Iha parte seluk Diretór Ezekutivu Fundasaun Mahein (FM) Nelson Belo dehan, ho situasaun hirak ne’e mak FM nafatin ezije ba governu atu bele aselera rekrutamentu ba membru foun PNTL nian.
“Ita husu atu aselera rekrutamentu ba membru foun, ne’e atu bele substitui membru PNTL sira ne’ebé tama ona ba idade reforma no hakarak atu reforma labele kaer metin sira, tanba ho razaun menus rekursu umanu,” nia dehan.
Nia hatete, FM apoiu desizaun membru sira ne’ebé mak hakarak tama reforma nune’e bele fó oportunidade ba jerasaun foun sira hodi lidera instituisaun PNTL.
Entretantu Ministru ba Ministériu Interiór Francisco da Costa Guterres hatete, dadaun ne’e governu hadia ona lei orgánika PNTL nian hodi bele halo reforma ba membru PNTL ne’ebé tama ona idade reforma.
“Molok sira ba reforma ita tenke kria uluk kondisaun dignu ba sira ho razaun ida ne’e mak to’o agora seidauk halo reforma, tanba ita sei hadia fila fali lei orgánika PNTL nian,” nia hatete.
Nia hatete, kona-ba membru sira-ne’e tama ona idade reforma maibé sei kontinua servisu maske kondisaun saúde ladi’ak, governu no komandu jerál liuhusi Departamentu Saúde PNTL kria ona oráriukonsulta ba sira ho doutór espesífiku sira.Alende ne’e nia dehan, kona-ba rekrutamentu kadetes foun dadaun ne’e governu ho Komandu Jerál PNTL hahú kria ona komisaun ba rekrutamentu nian ne’ebé sei realiza iha fulan Juñu tinan ne’e.
