Ministériu Edukasaun (ME) husu Eskola Sekundáriu Tékniku Vokasionál (ESTV) Agríkola Maliana no Natarbora atu apoiu produtu ne’ebé sira kuda ba programa merenda eskolár iha munisípiu hotu.
Sekretáriu Estadu Eskola Sekundáriu Jerál no Eskola Sekundáriu Tékniku Vokasionál (ESJ-ESTV) Domingos Lopes Lemos, hatete, durante ne’e eskola rua-ne’e prodúz produtu hanesan modo barak, maibé sira la oferese ba merenda eskolár.
Nia dehan, tanba ne’e liuhusi vizita ne’e mak halo ba eskola rua-ne’e hodi koalia oinsa sira bele oferese produtu ne’ebé sira iha ba programa merenda eskolár ba eskola sira.
“Ba oin ESTV Agríkola Maliana no Natarbora sei apoiu produtu ne’ebé sira produz ba programa merenda eskolár,” nia hatete.
Nia hatete, Ministériu Edukasaun oferese ona karreta pic up rua ba eskola rua-ne’e hodi fasilita fornese produtu ne’ebé sira iha ba merenda eskolár.
“Liuhusi meiu ida-ne’e iha tempu badak eskola sira sei prodúz aifuan no modo sira hodi nune’e sira fornese merenda ba eskolár sira,” nia hatete.
Nia dehan, ME kontinua fó apoiu ba eskola rua ne’e hodi bele fasilita di’ak liu tan sira-nia atividade prátika iha agrikultura nian.
Iha fatin hanesan, Diretór Eskola Téknika Vokasionál Agríkola Natarbora Agustinho dos Santos hatete, durante ne’e produtu ne’ebé iha, utiliza hodi fó ba estudante sira han iha asrama nune’e mós fó ba komunidade sira.
“Tinan ne’e Ministériu Edukasaun husu ajuda ba eskola atu bele apoiu fornese produtu ne’ebé sira iha ba merenda eskolár,” nia hatete.
Nia informa, produtu ne’ebé sira kuda hanesan, kanko, mostarda, alfase, tomate, baria, bringela, foresikoti repoliu.
“Produtu hirak ne’e ami sei oferese hotu ba merenda eskolár ba eskola sira ne’ebé besik,” Diretór ESTV Agríkola Natarbora Santos informa.Nia dehan, gradese ba Governu liu hosi Ministériu Edukasaun bele ajuda ona eskok ida ne’e halo, mundansa buat barak iha eskola ne’e, nune’e bele utiliza produtu ne’ebé iha ba merenda eskolár.
