Komandante Polísia Munisípiu Díli, Superintendente Xefe Orlando Gomes dehan, ho reativasaun Konsellu Polísiamentu Komunitariu (KPK) durante ne’e kontribui tebes ba redusaun kazu krime iha kapitál Díli.
Nia dehan, durante KPK la funsiona iha kapitál Díli kada fulan, komandu Díli sempre rejistu kazu rihun-rua (2000) ba leten, maibé hahú reativa fali Programa KPK ne’e rejistu kazu hahú husi fulan Jeneiru to’o Marsu 2025 redus ba atus-tolu (300) de’it.
Nia dehan, servisu KPK nian ne’e ajuda tebes Ofisiál Polísia Suku (OPS) reforsa servisu Polísia Nasionál Timor-Leste (PNTL) no intensiva kontrolu kada bairu iha Díli hodi redus konflitu.
“Ita bele dehan katak ho reativa KPK ne’e kontribui tebes ba redusaun kazu krime iha kapitál Díli,” Komandante Polísia Munisípiu Díli Superintendente Xefe Gomes informa iha knaar fatin.
Nia hatete, hahú iha fulan Janeiru tinan 2025 ne’e reativa fila fali KPK iha suku 31 iha kapitál Díli ho objetivu apoiu reforsa prevensaun krime kada bairo.
“Ita haree rezultadu pozitivu tebes, tanba hatudu katak hahú husi fulan Jeneiru to’o Marsu iha de’it 300, ita rejistu kazu ne’e númeru ne’e tun tebes,” nia informa.
Nia informa, husi 2023 kazu krime iha Munisípiu Díli sa’e no tinan 2024 mós sei kontinua sa’e, maibé tinan 2025 ne’e iha fulan tolu nia laran rejistu de’it 300 krime.
Entretantu, Diretór Ezekutivu Fundasaun Mahein (FM) Nelson Belo dehan, servisu KPK ne’e importante tebes ba prevensaun krime, tanba sira servisu besik liu ba komunidade no sira mak koñese didi’ak karakter komunidade nian.
“Ita haree KPK servisu hamutuk ho OPS identifika problema sira ne’ebé akontese iha komunidade, halo mediasaun no kazu sira-ne’e liga ho krime, sira submete ba komandu hodi halo prosesu, servisu sira-ne’e mak durante ne’e ita akompaña iha KPK,” nia salienta.
Alende ne’e nia dehan, Komandu PNTL Munisípiu Díli mós nafatin reforsa viabilidade liuhusi patrollamentu hodi apoiu KPK nia servisu iha terenu labele husik sira halo servisu mesak.
“Iha husu mós ba parte Komandu atu bele apoiu kapasitasaun ba membru KPK sira oinsa halo atendimentu ho profesionalismu ba komunidade,” Diretór FM Belo informa.Nia dehan, atendimentu KPK nian ba prevensaun krime iha komunidade di’ak ona, maibé atu di’ak liu tan presiza formasaun no kompleta ekipamentu nesesáriu sira atu bele fasilita sira-nia servisu baprevensaun.
