Diresaun Nasionál Transporte Terrestres (DNTT) iha Ministériu Transporte no Komunikasaun (MTK) la autoriza sirkulasaun taksi kinur, tanba kondisaun aat hotu ona no risku ba ema nia vida.
Diretora DNTT, Maria Antónia Vitor da Costa dehan, sira sei koopera ho Diresaun Tránzitu Seguransa Rodaviariu (DTSR), PNTL, hodi halo operasaun ba sirkulasaun taksi kinur, tanba kodisaun husi taksi sira-ne’e liu prazu ona.
“Ita la autoriza ona sirkulasaun taksi kinur iha kapitál Díli, tanba kondisaun la di’ak risku ba pasajeiru nia vida,” nia hatete.
Nia hatete, iha tinan 2023 DNTT konsege hapara ona taksi kauze 400 ne’ebé kondisaun ladi’ak, maibé taksi balun mak sei kontinua sirkula hela.
Nia dehan, DTSR sira halo operasaun mak hetan karreta sira ne’ebé nia inspesaun liu prazu ona ho nia kondisaun ladi’ak sei hapara.
“Ita haree karreta taksi barak mak kondisaun ladi’ak no sira-na’in rasik ba ona halo pedidu atu muda ba privadu, tanba karreta nia kondisaun la permite ona atu serkula hanesan transporte taksi,” nia dehan.
Iha parte seluk Diretór DTSR Superintendente Asistente Luis da Costa dehan, dadaun ne’e tránzitu simu ona informasaun husi DNTT hodi halo kontrolu ba sirkulasaun taksi kinur iha Díli laran.
“Operasaun ne’e ita foka ba tinan plat nian nune’e mós kondisaun taksi nian, kuandu ita identifika plat 33 no kondisaun aat ita prende no hapara sirkulasaun hodi entrega ba DNTT,” nia salienta.
Nia dehan, dadaun ne’e polísia hapara ona taksi kinur hamutuk haat (4) ba oin sei kontinua halo pasa-revista (cek poin) ba taksi kinur sira hodi para sirkulasaun.
Entretantu Taksista Lazaro Neves dehan, taksi ne’ebé durante ne’e utiliza ne’e halo sirkulasaun hodi buka osan ba sustenta família no oan sira ba eskola.
“Ha’u kumpri regra governu nian, tanba ne’e dadaun ne’e ha’u sei kontinua halo sirkulasaun tula pasajeiru to’o bainhira DNTT dehan hapara ha’u prontu para,” nia dehan.
Nia dehan, ema hotu nia lei nia okos, tanba hanesan taksista prontu kumpri, maibé husu mós governu tenke kria kampu servisu.
“Antes governu hapara ami-nia sirkulasaun tenke kria kedan servisu mai ami atu nune’e ami bele buka osan hodi sustenta familia,’ nia dehan.Nia hatete, dadaun ne’e atu buka servisu ne’e susar tanba ne’e governu tenke prepara kedan mak bele hapara rikulasaun taksi kinur.
