Asosiasaun Hali ba Dame (HABADA) konsidera despezu forsadu ne’ebé implementa husi Sekretariadu Estadu Asuntu Toponimia Organizasaun Urbana (SEATOU) fó impaktu ba familia sira ne’ebé durante ne’e halo negósiu iha dalan ninin.
“Despezu sira dala barak akontese la ho konsulta adekuadu, kompensasaun, ka fornesimentu uma alternativu, ne’ebé agrava vulnerabilidade sira hosi umakain sira ho rendimentu ki’ik, ne’ebé mak buka de’it sira-nia moris iha dalan ninin,” dehan Diretór HABADA, Abel Amaral, iha nia servisu fatin Komoro, Díli.
Nia hatutan, konsekuénsia hosi despezu forsadu maka todan liu, liuliu ba família sira ne’ebé depende ba merkadu lokal, negósiu ho atividade kiik sira iha dalan.
“Deslokasaun perturba atividade sira ne’ebé hamosu rendimentu, hodi obriga ema barak lakon servisu ka kondisaun traballu ne’ebé la serteza, na’in ba negósiu ki’ik sira, vendedór ambulante sira, no peskadór sira lakon kliente no espasu operasional sira, ne’ebé hamosu instabilidade finanseira no aumentu iha nível ki’ak nian,” nia esplika.
Nia husu ba Governu tenke halo uluk planu urbanu sentradu iha komunidade hodi projetu dezenvolvimentu sira tenke iha planeamentu partisipativu, nune’e permite komunidade sira ne’ebé afetadu atu hato’o sira-nia preokupasaun no kontribui ba solusaun reassentamentu.
Iha fatin ketak, komunidade Suku Becora Postu-Administrativu Cristo Rei Munisípiu Díli Atanasia do Santos hateten, SEATOU ho nia ekipa hasai de’it sira no hapara atu labele faan tan sasan iha dalan.
“Ami-nia moris loron-loron mak faan de’it modo tahan hodi sustenta ami-nia nesesidade, maibé agora ami labele faan ona, tanba espasu ba ami hodi buka moris mós la iha ona, tanba sira mai duni ami no hadau hotu ami-nia sasan,” nia dehan.
Nia hatutan, durante ne’e hala’o moris depende de’it ba sasan sira-ne’e, faan hodi hola han hemu, hodi hatama oan sira ba eskola.
“Ami la tane liman ba governu atu ajuda, ami rasik buka hodi sustenta moris loron-loron nian,” nia dehan.
Nune’e mós Sekretáriu Estadu SEATOU, Germano Santa Brites, hateten, buat hotu governu fó sai ona ba komunidade sira, tanba ne’e komunidade sira tenke koopera.
“Durante ne’e ami halo ona diálogu ho komunidade sira husi Kulu-hun to’o Becora terminal, buat hotu ami ko’alia ona iha ne’eba. Tanba ne’e husik governu servisu, ita orienta ona ekipa hodi halo kontrolu ba komunidade sira ne’ebé la kumpri, hetan nafatin faan iha dalam públiku sira ekipa sei foti hotu sira-nia sasan, tanba durante ne’e ita avizu ona,” nia dehan.Nia hatutan, SEATOU halo servisu tuir lei, komunidade ne’ebé la kumpre entaun kontra lei ne’e.
