Postu Unidade Polísia Marítima (UPM) iha postu administrativu Suai Munisípiu Covalima anin sobu.
Komandante UPM, Superintendente Eugenio Pereira informa, dadaun ne’e UPM hasoru difikuldade iha infraestrutura ligadu ho akontesimentu anin subu postu UPM iha Suai no hetan estragus seluk tanba dezastre naturais no ida-ne’e prejudika tebes ba servisu membru sira iha terenu.
Komandante haktuir katak postu refere nudar mós fatin ba membru UPM sira hela ba.
“Dadaun ne’e ita laiha fatin seguru ba membru polísia sira hela hodi halo servisu, maibé membru UPM sira-ne’e nafatin sakrifika sira-nia aan halo servisu no problema sira-ne’e aprezenta ba komandu PNTL hodi informa ba Governu bele tau atensaun,” Komandante UPM Superintendente Pereira dehan.
Nia hatete, membru UPM hamutuk na’in 12 destakadu iha postu Suai, sira nafatin utiliza meiu ne’ebé iha, hodi salva sasán eletrónika no husu apoiu urjente ba komandu PNTL ho Governu atu halo intervensaun lalais para sira bele halo servisu.
Entretantu, Komandante Jerál Polísia Nasionál Timor-Leste (PNTL) Komisáriu Hendrique da Costa dehan, iha akontesimentu ne’e komandu simu informasaun no orienta kedan membru sira atu kuidadu an bainhira anin boot.
“Ha’u orienta parte lojístika ba iha fatin ne’ebá hodi haree posibilidade saida mak ita bele halo, liuhusi foti medida urjenti atu salvaguarda membru sira hodi halo servisu ho seguru,” nia hatete.
Nia dehan, komandu PNTL sei hato’o relatóriu no proposta ba Governu liu-liu Ministériu Interiór hodi fo apoiu rekoperasaun para membru polísia sira nafatin halo servisu ho kondisaun di’ak.
