Institutu Nasional Kombate HIV-SIDA (INCSIDA) servisu hamutuk ho Ministériu Saúde (MS) fó treinamentu ba pesoal saúde sira iha munisípiu Díli, kona-ba oinsá atu fó tratamentu ba ema sira ne’ebé moris ho HIV-SIDA iha Timor-Leste.
Diretór Tékniku Protesaun Prevensaun no Komunikasaun iha INCSIDA, Silvestre da Costa hateten pesoál saúde sira tenke proteje ema sira ne’ebé mak moris ho HIV-SIDA.
“Pesoál saúde sira presiza fó atendementu di’ak no asegura ema sira ne’ebé moris ho HIV-SIDA, atu nune’e ema sira ne’e kontinua mai halo tratamentu labele halai sees fali husi tratamentu, tanba dala barak pesoál saúde sira la asegura ema sira-ne’e, mak ikus ema sira ne’e hili dala sees husi tratamentu,” nia esplika.
Nia hatutan, liuhusi treinamentu refere atu bele hasa’e di’ak liutan pesoal saúde sira-nia koñesementu ba atendementu ba ema moris ho HIV-SIDA.
“Ita fó treinamentu ida ne’e ba pesoál saúde sira iha munisípiu Díli, atu nune’e bele hasa’e di’ak liután pesoál saúde sira-nia koñesemetu bainhira fó atendementu ba ema sira ne’ebé mak moris ho HIV-SIDA,” dehan Diretór Tekniku INCSIDA Costa.
Tuir dadus ne’ebé fó-sai ema sira ne’ebé mak afeta ba moras HIV-SIDA husi 2003-2025 hamutuk na’in 2.256 no na’in 386 mak lakon vida no ema na’in 566 mak sees ona husi tratamentu.
“Ema na’in 566 ne’ebé halai sees husi tratamentu, ita tenke buka hatene motivu husi problema ne’e, tanba dala ruma hetan estigma no deskrimisaun husi pesoál saude sira. Dala ruma mós hetan estigma no diskriminasaun husi família ou komunidade sira. Entaun sira senti la di’ak nune’e hili dalan dook husi tratamentu.
Liuhusi problema sira-ne’e ita hamutuk ho Ministeriu Saude fó formasaun ba pesoál saúde sira ne’ebé toma konta ba halo tratamentu ba HIV-SIDA, hodi fó hanoin ba sira oinsa atu kuidadu pasiente sira-nia privasidade,” Diretór Costa afirma.
Relasiona ho asuntu refere, Xefe Departamentu ba Programa Kontrola Moras Hadaet (DPKMH) iha Ministériu Saúde, Ambrozio Soares Trindade hateten, treinamentu ba pesoál saúde sira ne’ebé mak durante ne’e haknaar an ba kontrola moras HIV-SIDA iha munisípiu Díli ne’e atu bele hasa’e koñesimentu di’ak liután.
“INCSIDA servisu hamutuk ho Ministériu Saúde hodi fó tratamentu ba Pesoál saúde sira ne’ebé mak durante ne’e haknaar an hodi tau matan ba ema moris ho HIV-SIDA no moras infesaun sira, atu nune’e bele hasa’e di’ak liután sira-nia koñesimentu kona-ba oinsá atu bele fó tratamentu ba ema moris ho HIV-SIDA no asegura mós pasiente sira-nia moras,” dehan Xefe Departamentu DPKMH, iha Igreja Protestante, Caicoli, Díli.
Nia hatutan, moras HIV-SIDA ne’e moras ne’ebé mak la di’ak, tanba ne’e mak presiza fó tratamentu ba Pesoál saúde sira atu nune’e bele asegura ema sira ne’ebé mak moris ho HIV-SIDA.
