Durante 2024 Klínika Ordem de Malta Timor-Leste halo tratamentu ba pasiente moras Infesaun Respiratóriu (ISPA) hamutuk atus neen tolunulu (630).
“Iha tinan kotuk 2024 to’o mai agora ami konsegue halo tratamentu ba pasien sira ne’ebé mai ho moras ISPA hamutuk 630,” dehan Jerente Klínika Ordem de Malta Timor-Leste, Norman Magalong iha nia servisu fatin Pantai Kelapa, Díli.
Nia hatutan, depois de identifika moras ISPS, iha mós moras seluk hanesan, infesaun virus hamutuk 1570, depois hipertensaun 1246.
Nia hateten, durante ne’e sira halo tratamentu hanesan konsulta Jeral ba inan isin-rua no labarik sira.
“Durante ne’e ami halo hela ami nia atividade hanesan konsulta jeral ba inan isin-rua sira no vasinasaun ba labarik sira,” nia esplika.
Nia dehan, hahu husi loke klínika ida-ne’e to’o mai agora sira fó ona atendimentu ba hamutuk 72.260.
Iha fatin hanesan, Pasiente Agusta Nunes hateten, durante tempu udan moras ne’ebé hanesan inus-been, mear, isin-manas no ulun-moras ne’e mak barak.
“Ita mai konsulta iha ospitál sira-ne’e maioria mak moras sira-ne’e, inus-been, mear, isin-manas no ulun-moras moras seluk la iha, tanba ita hatene katak tempu ida agora ne’e, tempu udan entaun moras ida ne’e mak barak,” nia dehan.
Nia hatutan, ba konsulta iha, tanba moras isin manas, inus been, ulun moras, besik semana ida ona.
“Ha’u moras isin manas, ulun moras, inus been besik ona semana ida, tanba ne’e ohin ha’u konsulta iha ne’e atu bele hetan netik aimoruk balun hodi bele konsumu, atu nune’e bele rekopera lalais husi moras ne’e,” nia salienta.
