Ministériu Justisa (MJ), la autoriza pesoál Polícia Científica e de Investigação Criminal (PCIC) utiliza arma fora husi oras servisu hodi ameasa ema iha dalan hanesan foin lalais akontese iha Delta.
Ministru Justisa Sergio de Jesus Fernandes da Costa Hornai dehan, kazu pesoál PCIC lori pistola ameasa joven na’in-tolu iha área Delta ne’e presiza halo averiguasaun hodi hatene motivu akontesimentu nian.
Nia hatete, razaun, pesoál PCIC ida atu uza Patrimóniu Estadu hanesan arma ba interese pesoál ho forma seluk ameasa ema nia vida la’ós apropriadu, ne’e krime.
“Ita la autriza pesoál Polícia Científica e de Investigação Criminal ida utiliza arma fora husi oras servisu no hodi ameasa sidadaun sira iha dalan públiku,” MJ Hornai dehan.
Nia hatete, la admite Pesoál PCIC ida utiliza propriedade estadu nian ho situasaun saida de’it no lori pistola ba ameasa fali sidadaun sira.
“Husu ba Diretor Jerál PCIC ho estrutura tenki foti ona medidas balun koordena ho parte vitima hato’o keixa para halo prosesu.
Dalan ida tan, se ida-ne’e akontese hanesan informasaun sira espalla ona iha media komunikasaun sosiál hanesan Ministru ha’u la admite,” nia informa.
Nia dehan, kazu hanesan ne’e presiza halo investigasaun ida klean, para halo julgamentu.
“Ha’u bele hatete kazu pesoál PCIC nian ne’e ha’u lamenta tebes tenki halo prosesu investigasaun, kuandu mai ho baze relatóriu ida loos ita foti medidas halo demisaun submete ba prosesu kriminál nian,” MJ salienta.
Entretantu Komanadante Jerál PNTL Komisáriu Henrique da Costa hatete, Departamentu Investigasaun Kriminál Nasionál (DIKN) rejista ona kazu pesoál PCIC lori Pistola ameasa joven na’in-tolu iha área Delta.
“Ita rejista duni ona kazu pesoál PCIC ida lori pistola ameasa joven na’in-tolu iha área Delta. Agora ita-nia investigasaun hala’o hela prosesu ida-ne’e, depois aprezenta ba Ministériu Públiku MP kontinua halo prosesu ba oin atu hetan desizaun ruma ligadu ho kazu ida-ne’e,” Komisáriu Costa dehan.
Nia dehan, pesoál PCIC lori pistola ameasa joven na’in-tolu ne’e ho inisial FG prosesu ho númeru NUK 0047/25.PNSIK.
Iha parte seluk Diretór Nasionál iha Polícia Científica e de Investigação Criminal (PCIC) Vicente Fernandes Brito hatete, dadaun ne’e parte investigasaun rekolla informasaun sira hotu kuandu iha indisiu forte sei aplika prosesu disiplinár ba membru ne’ebé ameasa sidadaun sira ho arma.
Nia dehan, laiha investigadór ida no laiha espesialista ida, hanesan funsionáriu PCIC atu afasta husi responsabilidade no prosesu disiplinár, tanba ne’e halo prosesu averiguasaun, kuandu iha dúvida, maibé simu informasaun ne’e iha indisiu forte sei prosesu disiplinár.
Nia hatete, tanba ne’e iha informasaun sira-ne’e konjuga ho provas sira sei foti medida disiplinár ba membru refere.
“Kuandu ha’u simu informasaun konjuga provas ne’ebé iha hatudu katak iha forte indisiu ba komitmentu prosedimentu disiplinár, kestaun administraivu no bele mós kestaun kriminál,” nia hatete.
Nia dehan, kuandu membru ida utiliza arma bainhira hala’o hela servisu iha terenu, kuandu la hala’o servisu mak utiliza arma sira-ne’e sei iha sansaun ka prosedimentu legál sira tuir lei ne’ebé vigóra iha Timor-Leste.
