Timoroan na’in-hitu (7) kontinua estudu mestradu iha área Komunikasaun iha Universidade Mercu Buana (UMB), iha Jakarta Oeste, Indonesia, liuhusi selu rasik kustu hotu estudu nian, tanba hakarak aumenta nivel akadémiku, hodi bele uza iha idak-dak nia servisu fatin.
Estudante Efrem Duarte Guteres nu’udar funsionáriu iha Consello de Imprensa hateten, sira hala’o hela estudu Mestradu iha Universidade Mercu Buana (UMB) iha área Komunikasaun liuhusi aula online.
“Ha’u ho kolega na’in-hitu mak kontinua hela estudu mestradu nian iha UMB. Iha estudu ne’e ami selu rasik ho razaun ita-nia universidade iha Timor-Leste seidauk iha mestradu área Komunikasaun Sosiál, ho nune’e ha’u desidi maske selu karun, maibé ho pasiénsia kontinua iha universidade ne’e,” nia dehan.
Nia hatutan, área mestradu ne’e importante tebes ba sira, tanba hakarak haklean sira-nia koñesementu ne’ebé sira hetan ona iha banku lisensiatura nian.
“Ami eskola liuhusi online maibé la signifika online to’o hotu iha atividade ne’ebé ami presiza tuir prezensa iha Universidade Mercu Buana hanesan ami tuir serbisu sosiál liuhusi Universidade halo sosial voluntir iha suka bumi durante loron tolu kalan rua,” dehan Efrem.
Nia akresenta, Estudante Timoroan na’in-hitu ne’e sei partipa prezensial dala haat UMB foin bele remata estudu, tanbe ne’e kriteria universidade nian ne’ebé sira tenki kumpri.
“Aula mak ami tuir online, iha kriteria balun ne’ebé ami presiza marka prezensial iha Universidade, maske finansa ba ami todan, maibé hakarak di’ak iha futuru tenki esforsu liuhusi difikuldade oin-oin,” Tenik Efrem.
Iha sorin seluk Adelina Martinha Freitas nu’udar dosente kontratadu iha Universidade Nasional Timor Lorosa’e (UNTL) Faculdade de Ciência Sociais Departamento de Comunicação Social (DCS) hateten, hakarak kontinua estudu mestradu, tanba mestradu importante tebes hodi suporta iha nia atividade hanorin.
“Selu mestradu karun tuir ami-nia kapasidade, maibé hakarak ka lakohi ha’u tenki kontinua, importante iha ha’u-nia servisu fatin, kriteria husi servsiu fatin tenki mestradu foin bele hanorin no bele sai dosente permanente ho ida-ne’e ha’u esforsu rasik kontinua estudu ne’e,” hateten Freitas.
Nia dehan tan ko’alia kona-ba kustu selu estudu mestradu ne’e karun tebes, maibé hakarak futuru ne’ebé di’ak pasiensia selu rasik.
“Ami-nia mestradu ne’e sei fó benefisiu ba ami-nia aan no mós ba ami-nia departamentu ne’ebé ami servisu ba, tanba bazeia ba kriteria husi ANAAA (Agência Nacional para Avaliação e Acreditação Académica),” hatutan Freitas.
Nia hatutan, tan Timoroan na’in-hitu ne’e maka Efrem Duarte Guterres, Adelina Martinha Freitas, Gaudençio Marques Figueiredo, Maria Isabel Freitas Moreira, Jorgino dos Santos, Domingas da Silva Gonçalves, no Rogaya Amelia Castro.
