Komunidade husi aldeia 12 de Outobro Suku Comoro Albertina do Santos hateten, Tasi-Tolu bee la iha kada loron tenke hola bee jeregen ida ho $0.05 sentavus.
Nia dehan, durante tinan 6 ona sira, kada loron tenke hola bee ba nesesidade loron-loron nian.
“Ami hela iha ne’e tinan 6 ona, maibé ami tenke sosa bee, bee iha ne’e jerigen ida ho $0.05 sentavus lima, hodi uza ba tein han, hemu, no uza ba haris no fase ropa,” nia dehan.
Nia hatutan, durante ne’e hato’o ona preokupasaun sira-ne’e ba autoridade suku, munisípiu nomós governu, maibé sira nafatin hola bee.
“Ami-nia preokupasaun sira-ne’e, ami hato’o ona ba autoridade munisípiu no governu sira, maibé até agora ami nafatin hola bee,” nia esplika.
Nia mós husu ba Governu atu tau matan ba sira, tanba sira mós hanesan sidadaun ida ne’ebé iha direitu atu asesu ba bee moos.
Iha fatin seluk, Xefe Suku Comoro Edigio José Marçal hateten, problema bee moos ne’e autoridade lokal sira hato’o ona ba Governu maibé to’o agora seidauk rezolve.
“Ami hato’o ona problema sira-ne’e ba Governu, maibé to’o agora problema bee moos ne’e seidauk bele rezolve, maibé ita sei esforsu atu nune’e governu bele rezolve problema sira hanesan ne’e,” nia dehan
Nia hatutan, bee moos ne’e importante tebes, tanba komunidade sira ne’ebé hela iha rai ida-ne’e iha direitu atu asesu.
“Komunidade sira iha direitu atu asesu ba bee moos, iha direitu atu asesu saúde, maibé ita-nia Governu la tau importánsia ba problema sira hanesan ne’e,” nia akresenta.
Nune’e mós Jornalista TDW tenta halo kontaktu ho Presidente BTL, maibé to’o agora seidauk iha resposta.
