Sekretáriu Estadu Sekretaria Estadu Peska (SEP) Domingos da Conceição dos Santos hateten iha tinan rua nia laran SEP halo esportasaun budu-tasi ba indonesia hamutuk tonelada 50.
“Iha tinan rua nia laran ita konsegue esporta budu-tasi hamutuk tonelada 50 ba rai-liur Indonesia no sira iha Indonesia mós mai direita hola de’it iha ne’e,” dehan SEP dos Santos dehan iha nia servisu fatin, MAPPF, Comoro, Díli.
Nia hatutan, SEP komesa ona harii armajen budu-tasi nian ba komunidade sira iha Liquiçá, Atauro no Maliana.
“Ita komesa ona harii armajen budu-tasi nian iha Liquiçá-Ulmera, Atauro no entrega ona ba komunidade sira, maibé iha Maliana mak seidauk, tanba konstrusaun lao hela,” nia esplika.
Nia salienta, produsaun ba budu-tasi ne’e barak liu iha Atauro, tanba ne’e iha tinan ida-ne’e, SEP sei ajuda mós ekipamentu balun hodi ajuda sira.
“Produsaun budu-tasi barak liu ne’e iha Atauro, tanba ne’e iha tinan ida-ne’e nia laran ita sei ajuda ekipamentu hanesan, tali, redi no asesor sira seluk ne’e para bele ajuda komunidade sira liuliu atividade marinas,” nia afirma.
Nia akresenta, ba oin sei haruka tékniku sira ba haree atividade budu-tasi iha Munisipiu Baucau-Watabo atu nune’e bele ajuda mós ekipamentu balun ba sira.
Nia deklara tinan kotuk SEP tau ona orsamentu atu sosa sasan sira-ne’e, maibé la konsege ezekuta entaun Orsamentu sira tau de’it.
Iha parte seluk Diretór Agrikultura Munisípiu Liquiçá, José Pereira hateten, iha Munisípiu Liquiçá-Ulmera, komunidade sira barak mak hakiak budu tasi.
“Komunidade sira iha Liquiçá-Ulmera barak mak hakiak budu tasi, komunidade sira-ne’e moris deit ho ida-ne’e, tanba kada loron ema mai hola to’o $50 to’o $100,” nia dehan.
Nia hatutan, komunidade sira-ne’e harii rasik sira-nia grupu depois mak sira kuda budu tasi, tinan hirak liu ba governu sosa hodi esporta ba rai liur.
“Komunidade sira ne’ebé hakiak budu-tasi ne’e, sira grupu la’ós individu, tanba ne’e tinan hirak liu ba kotuk governu mai hola hodi esporta ba rai liur besik tonelada lima hanesan ne’e, ida-ne’e husi Munisipiu Liquiçá de’it,” nia afirma.
Nia dehan, grupu hirak ne’e hetan apoiu husi governu liuhusi Sekretariu Estadu Peska, hanesan redi no tali, no agora mós governu estabelese tan ona, armajen ida iha Liquiçá, maibé seidauk uza.
