Koordenadór Estudante Hadomi Natureza (ESHANA) iha Universidade Nacional Timor Lorosa’e (UNTL) Inocencio de Deus hatete, ezisténsia ESHANA atu transforma mentalidade estudante nian sai joven transformadór.
Nia hatutan, ESHANA UNTL ho objetivu ida atu ne’ebé hatur ona iha estatutu katak transforma estudante sira-nia mentalidade hodi sai joven tranformadór iha universidade no ba sosiedade.
“ESHANA UNTL iha nia objetivu maka atu transforma mentalidade ema hotu nian no vizaun atu transforma mentalidade joven no estudante sira-nian hodi sai ajente transformador iha futuru hodi tau konsiderasaun sériu ba problema ambiental, hadomi natureza no konservasaun sira no ba prezerva kultura orijional ita-nian,” tenik nia.
Nia dehan, asaun ne’ebé hala’o mak kontinua hala’o nafatin atividade sira iha organizasaun ne’e nian tuir programa sira-ne’ebé hatur ona.
“ESHANA iha Programa prinsipal iha maka hanesan jornada lao ain ne’ebé planeia ona katak sei lao husi Oecusa mai Díli no iha mós atividade seluk hanesan peskiza kona-ba diferente tais husi munisípiu sira, sae foho no tama ai-laran atu hatudu katak feto mós iha diretu bele halo atividade sira-ne’e, kuidadu ambiental, reflorestasaun no puplic speaking,” dehan Koordenador Inocencio.
Nia hatutan, dadaun ne’e Grupu Estudante Hadomi Natureza iha ona membru hamutuk kuaze atus haat (400).
Aliende ne’e Aurora de Oliveira Ximenes hanesan membru ESHANA hatete, nia hahu envolve iha organizasaun ne’e iha 2021 até agora no aprende buat barak tebes hodi bele muda nia pensamentu.
“Ha’u hahu envolve iha ESHANA UNTL iha tinan 2021 to’o agora no esperiénsia lubuk maka ha’u hetan maka bele diskusaun, fó ideia no sempre kolabora ho estrutura organizasaun nian no autoridade sira banhira halo atividade, aleinde ne’e mós bele aprende kona-ba oinsa sai lideransa no puplic speaking ne’ebé di’ak.
Iha inisiu ha’u seidauk iha koñaimentu kona-ba sira-ne’e, maibé liuhusi vontade aprende ha’u bele aprende buat lubuk sira-ne’e, parte seluk mós bele aprende oinsa meneje tempu ho di’ak kona-ba eskola no tuir atividade organizasaun nian,” dehan Aurora.
Nia hatutan, liuhusi esperiénsia lubuk ne’ebé nia hetan husi organizasaun ESHANA bele tranforma nia sai ema Inteletual ida.
“Liuhusi atividade, esperiénsia no materia lubuk ne’ebé ha’u hetan durante partisipa iha organizasaun ESHANA bele transforma ha’u no hatudu mos katak feto bele hodi hamriik iha oin no bele hola parte mós iha estrutura hodi organiza atividade sira, hetan konfiansa oinsa halo peskiza kona-ba tranformasaun uma-lisan orijinal mai modernu nian no konsege dezenvolve livru kona-ba kultura nian hotu,” tenik nia.
