Komandu Polísia Nasionál Timor-Leste (PNTL) apela ba governu liu-liu Ministériu Interiór atu halo rekrutamentu ba membru foun iha tinan 2025 hodi kompleta númeru atendimentu Polísia nian.
Komandante Jerál PNTL Komisáriu Henrique da Costa dehan, totál membru polísia ne’ebé iha hamutuk 4004 maibé ida-ne’e, balun ba apoiu iha migrasaun, balun ba iha fronteira balun seguransa pesoál, balun moras, balun tuir hela kursu iha rai liur, tanba ne’e mak halo númeru atendimentu ba komunidade ne’e menus.
“Ita eziji ba governu tenke aselera lalais rekrutamentu ba membru Polísia foun iha tinan 2025 ne’e hodi kompleta aumenta númeru atendimentu ba públiku,” nia dehan.
Nia dehan, tenke iha rekrutamentu atu nune’e iha enerjia foun ruma mai iha Polísia hodi bele kontinua servisu.
“Dalaruma tau hela farda mak hamriik ne’e mós kuandu iha problema ruma labele atende, tanba la iha forsa tanba idade ona,” Komisáriu Costa dehan iha knaar fatin Kailoki, Díli.
Nia dehan, rekrutamentu ne’e rasik iha Ministériu Interiór nia komitmentu hodi halo rekrutamentu, tanba ne’e husu atu aselera.
“Atu ne’e ita bele iha kontinuasaun númeru efetivu ne’e aumenta no aumenta atendementu ne’ebé di’ak ba ita-nia komunidade,” nia dehan.
Entretantu Ministru Interiór Francisco da Costa Guterres hatete, rekrutamentu ba mémbru polísia foun ne’e Konsellu Ministériu foin aprova. Tanba ne’e ba oin tenke hahú forma ekipa no haree kritéiru sira hodi prosesu ba rekrutamentu.
“Ita sei prepara komisaun rekrutamentu nian de’it ba prosesu hotu la’o los ona mak ita sei halo rekrutamentu, ita sei realiza iha tinan ida ne’e,” nia hatete.
Nia dehan, governu promete sei aselera rekrutamentu ba mémbru polísia foun hodi substitui sira ne’ebé moras no mate.
