Durante fulan Janeiru 2025 ema na’in hitu (7) mak lakon vida tanba kauza husi asidente tráfiku ne’ebé akontese iha territóriu laran.
Komandante Seguransa Rodaviáriu Nasionál Superintendente Asistente Luis da Costa dehan, asidente tráfiku ne’ebé akontese iha fulan janeiru ne’e Polísia Tranzitu rejistu kazu asidente hamutuk 179.
Nia dehan, husi kazu 179 ne’e kanek kaman 37, kanek todan 135, lakon vida 7 asidente hirak ne’e akontese iha territóriu nasionál.
“Iha ema na’in hitu (7) mak lakon vida, tanba kauza husi asidente tráfiku,” Komandante Seguransa Rodaviáriu Nasionál Superintendente Asistente Costa informa iha knaar fatin, Díli.
Nia informa, kazu hirak ne’e prosesu hotu ona no ida (1) iha ona finaliade iha tribunál, prosesu hela iha tribunál no sei iha prosesu iha Polísia iha 96 no rezolve anivel infratores iha 77.
“Husi asidentes ne’e tuir ami-nia analiza estatistika ne’e kauza dominate fatór humanu mak iha 90% fatór dalan 5% tantu fatór natureza mak 5%,” nia saliente.
Nia dehN, husi kazu informasaun nian rekolla reseitas ne’ebé kontribui ba kofre estadu iha fulan Janeiru ne’e $68,11.00.
Enkuantu total evidensia ne’ebé mak prende iha territóriu laran, iha fulan Janeiru ne’e hamutuk 1682 evidénsia ne’e kompostu husi kareta governu 5, transporte privadu 1029 nomós kareta públiku hamutuk 121.
Entretantu Mariano Martinis nu’udar kondutór dehan, kazu asidente sira ne’ebé sempre akontese kauza husi erru kondutór sira-nian.
“Ita dehan, erro husi kondutór sira, tanba halai motorizada no karreta la respeita sinais sira no lakontrola kondisaun transporte no konsumu alkohol,” nia hatete.
Nia dehan, tanba ne’e husu ba polísia tenke kontrolu no fó sansaun ba kondutór sira ne’ebé sempre kontra sinais tránzitu no sira ne’ebé konsumu alkohol, atu nune’e bele hamenus asidente tráfiku.
