Profesór hamutuk na’in atus ida (100) kompostu husi pre-eskolar no ensinu báziku tuir formasaun kona-ba literásia bázika no fonétika, bazeia ba planu prioridade tinan 2025 nian katak kontinua hadia abilidade literásia iha ensinu báziku nian.
Prezidente Institutu Nasionál Formasaun Dosente no Profesional Edukasaun (INFORDEPE) Domingos Martins dehan, formasaun no kapasitasaun hola parte iha prioridade Ministériu Edukasaun tinan 2025 nian.
“Dadaun ne’e ita fó formasaun ba professór hamutuk 100 husi pre-eskolar no ensinu báziku, hodi bele dezenvolve abilidade labarik nian no presiza hodi aprende lee,” nia dehan.
Nia dehan, Ministériu Edukasaun liuhusi INFORDEPE nafatin esforsu hodi hadi’a abilidade literásia iha livel pre-eskolár no ensinu báziku.
“Ita-nia peritu balun deskobre katak, fonétika ne’e ajuda tebes komprende relasaun entre letra no lian,” Prezidente INFORDEPE Martinis informa.
Nia husu ba profesór sira durante formasaun ne’e atu aprende di’ak liu tan, iha literásia nian nune’e bele dezenvolve abilidade labarik sira nian kona-ba lee.
Entretantu Formadora Aurora Asumção Sarmento dehan, programa ne’ebé Ministériu Edukasaun hasoru mak labaraik barak mak seidauk hatene lee.
“Estudante sira molok atu hatene lee, tenke hatene uluk letra nia son,” nia hatete.
Nia hatutan, formasaun ne’e importante tebes hodi haklean koñesimentu ba profesór sira husi pre-eskolar no ensinu báziku kona-ba literásia no fonétika hodi bele rezolve problema ne’ebé iha kona-ba labarik sira seidauk hatete lee.
