Ministru Agrikultura Pekuária Peska no Floresta (MAPPF) Marcos da Cruz hateten, Estensionista Agrikultura sira iha munisípiu sanulu resin rua inklui RAEOA servisu tenke uza farda, atu nune’e bele identifika liuhusi farda.
“Diretór Servisu Agrikultura husi Munisipíu 12 inklui RAEOA simu ona sira-nia farda atu nune’e sira bele uza hodi halo sira-nia servisu iha terenu no bainhira sira uza farda sira-ne’e la’o iha komunidade nia leet ema bele hatene sira katak sira mak estensionista sira mak ne’e,” dehan Ministru MAPPF Marcos iha Salaun MAPPF, Comoro, Díli.
Nia esplika, programa sira husi Agrikultura nian ne’e, sira mak hatene liu, tanba sira mak hanesan tékniku ne’ebé treinadu komprende iha esperiénsia hodi transforma buat ida bolu prátika futuru di’ak ba agrikultór sira.
“Ita-nia programa sira ne’e ita fahe hotu ona ba estensionista sira iha munisípiu, tanba ne’e estensionista sira-ne’e mak sei hala’o sira-nia servisu iha terenu hodi fó tratamentu ba agrikultór sira oinsá atu kuda batar, hare, modo ho di’ak,” nia deklara.
“Farda ne’ebé ita fahe ba estensionista sira-ne’e, atu nune’e sira la’o iha sosiedade nia leet karik ema bele hatene sira mak estensionista hodi nune’e agrikultór sira presiza sira kona-ba oinsá bele kuda hare bele uza adubu, oinsá atu halo protesaun ba sira-nia planta no animal sira, tanba ne’e ita fahe farda ne’e ba sira atu ema bele koñese sira,” nia esplika.
Iha parte seluk, Diretora Agrikultura Munisípiu Ainaro, Aguida Judit Mendonça hateten, farda ne’e di’ak, tanba bele ajuda ona estensionista sira iha munisípiu hodi halo servisu.
“Farda ne’ebé ami simu ne’e di’ak, tanba ami hanesan estensionista Agrikultura nian iha munisípiu bele uza, durante ne’e farda la iha,” dehan Diretora Agrikultura Munisípiu Ainaro.
Nia dehan, durante ne’e komunidade sira nunka hatene katak sira mak estensionista Agrikultura nian, maibé agora iha ona farda ne’e ema bele hatene ona sira-nia servisu.”Ami-nia farda iha ona ne’e di’ak, tanba durante ami ba halo sosializaun hodi fahe informasuan dala ruma komunidade sira la hatene ami, maibé agora sira bele hatene ami liuhusi farda ne’ebé ami hataisa,” nia salienta.
