Prezidente Repúblika Timor-Leste Jose Ramos Horta dehan, tenke moderniza Falintil-Forsa Defeza Timor-Leste (F-FDTL) hodi halo prevensaun no kontrolu ba krime trans-nasionál liuhusi tasi.
Nia dehan, papel seguransa Marítima ne’e importante tebes hodi fó seguransa ba krime hotu ne’ebé ultrasa husi tasi nune’e mós fó segurasa ba rikusoin Timor-Leste nian iha tasi.
“Papél ida-ne’e atu funsiona ho di’ak tenke dezenvolve no moderniza Falintil-Forsa Defeza Timor-Leste (F-FDTL) hodi kontrolu no halo prevensaun ba krime trans nasionál iha tasi,” nia hatete.
Nia dehan, dadaun ne’e krime trans nasionál ne’e sai ameasa tebes ba nasaun hanesan grupu tráfiku droga, tráfiku umanu, imigrasaun ilegál no sira ne’ebé soe lixu arbiru iha tasi laran.
“Ita-nia Falintil-Forsa Defeza Timor-Leste (F-FDTL) liu-liu Komponente Navál iha papél importante hodi halo defeza ba rekursu iha tasi. Tanba ne’e presiza moderniza,” Prezidente Repúblika Horta informa.
Nia dehan, presiza mós iha kooperasaun rejional hodi kombate krime trans nasionál sira, no fó sai planu sira ba lei programasaun militár hodi garante finansiamentu ba modernizasaun forsa armada.
Alende ne’e nia dehan, proteje mós Zona Ekónomika Eskluziva, no Sustentabel Greater Sunrise no Bioversidade sira iha tasi illa Atauro.
Entretantu Ministru Defeza Kontra Almirante Donaciano Costa Gomes “Pedro Klamar Fuik ” dehan, dezenvolvimentu F-FDTL kompara ho tinan hirak ba kotuk ne’e, dadaun ne’e komesa dezenvolve aan ona.
“Ita nafatin esforsu hodi investe iha área oin-oin hodi moderniza instituisaun Falintil-Forsa Defeza Timor-Leste (F-FDTL),” nia dehan.
Nia hatete, presiza sosa ekipamentu meiu ki’ik-book hodi koloka kada postu sira hodi kontrolu tasi nune’e mós investe illa kapasitasaun, infraestrutura, tanba ne’e husu ba Falintil Forsa Defeza Timor-Leste (F-FDTL) atu hala’o misaun tuir rekursu no ekipamentu ne’ebé iha hodi kombate atividade ilegál iha tasi.
