Ministériu Interiór estabelese Komisaun ida hodi halo avaliasaun servisu membru Polísia Nasionál Timor-Leste (PNTL) nian.
Ministru Interiór Francisco da Costa Guterres hatete, komisaun ne’e nia servisu espesifiku kona-ba disiplinár, kestaun funsionamentu instituisionál, no kestaun seguransa em jerál.
Nia dehan, durante ne’e la iha avaliasaun espesífiku ba Polísia Nasionál Timor-Leste (PNTL) no iha de’it avaliasaun jerál, tanba ne’e mak problema hirak ne’e sempre akontese nafatin.
“Ita estabelese ona komisaun espesífiku ida hodi halo avaliasaun kona-ba servisu, disiplinár, kestaun funsionamentu no kestau seguransa em jerál. Nune’e ita bele hatene hodi rezolve problema hirak ne’e,” Ministru Interiór Guterres hatete.
Nia dehan, komisaun ne’e sei avalia instituisaun durante tinan ida nia laran hodi haree la’o oinsá, la’o di’ak ona ka seidauk se seidauk nia problema ne’e iha ne’ebé.
“Ita buka atu rezolve problema ne’e no ita hametin instituisaun, atu nune’e paz no estabilidade ne’e kontinua la’o nafatin iha ita nia rai, nune’e estadu liuliu governu bele dezenvolvimentu hodi fó oportunidade ba joven sira asesu ba servisu,” nia informa.
Nia hatene, banhira halo avaliasaun identifika tiha problema sira, hodi bele rezolve no halo dezenvolvimentu ba instituisaun.
Iha fatin hanesan Komandante Jerál Polísia Nasionál Timor-Leste (PNTL) Komisáriu Henrique da Costa dehan, PNTL iha difikuldade barak ne’ebé mak nia impaktu ba iha implementasaun servisu.
“Kona-ba ita-nia polítika rasik nune’e mós rekursu umanu, ita-nia kapasidade atu implementa servisu, no difikuldade sira-ne’e mak sai hanesan dezafiu ida,” nia dehan.
Nia dehan, tanba ne’e liuhusi avaliasaun ne’ebé komisaun sira halo, fiar katak iha tinan 2025 nia laran bele hadia no implementa fila fali.
