Governu hahú ona halo reabilitasaun ba postu Unidade Patrollamentu Fronteira (UPF) hamutuk 47 iha fronteira hodi fasilita sira-nia servisu kontrolu.
Ministru Interiór Francisco da Costa Guterres dehan, progresu konstrusaun ba infraestrutura Polísia Nasionál Timor-Leste (PNTL) hahú husi fronteira mak mai Nasionál.
“Ita hahú halo ona reabilitasaun ba Postu Unidade Patrollamentu Fronteira (UPF) hamutuk 47 iha fronteira,” nia dehan.
Nia dehan, rezolve uluk problema infraestrutura iha fronteira, tanba sira-nia kondisaun mak aat liu, uma nakfera hotu, fatin laiha, dapur laiha, ahi laiha no bee mós la iha.
“Agora ita tenke buka para hadia infraestrutura hirak ne’e kompleta no fasilidade sira,” Ministru Interiór Guterres salienta.
Alende ne’e nia dehan, husi Postu 47 ne’e reablita ona 41 falta 6, tanba presiza dezeñu husi ADN.
Entretantu Komandante Jerál Polísia Nasionál Timor-Leste (PNTL) Komisáriu Henrique da Costa dehan, infraestrutura Polísia Nasionál Timor-Leste (PNTL) ne’e barak seidauk di’ak.
“Balun infraestrutura di’ak ona, maibé fasilidade laiha, tanba buat sira-ne’e presiza hadi’a no kompleta,” nia hatete.
Nia dehan, postu iha fronteira ne’e hamutuk 87 maské kondisaun ladi’ak, maibé membru Polísia Nasionál Timor-Leste (PNTL) liu-liu Unidade Patrollamentu Fronteira (UPF) nafatin ezekuta orden komandu nian hodi kontrola atividade hotu iha fronteira.
