Sekretáriu Estadu Floresta liuhusi Diresaun Jerál Floresta, kontinua halo sensiblizasaun ba komunidade sira atu labele oho animál fuik arbiru, tuir lei no 6/2020 kona-ba rejime jurídiku protesaun no konservasaun biodiversidade iha Timor-Leste.
Sekretáriu Estadu Floresta, Fernandino Vieira da Costa hateten, animal sira ne’ebé iha rai-maran no iha bee-laran hanesan lagoa sira, ne’e tenke halo konservasaun atu nune’e hodi proteje animal sira-ne’e.
“Diresaun Jerál Floresta kontinua halo sensiblizasaun ba komunidade bazeia ba dekretu lei no. 6/2020 kona-ba rejime jurídiku protesaun no konservasaun biodiversidade, ne’ebé iha rai-maran no iha tasi no lagoa sira ne’e atu nune’e ita bele halo konservasaun bele proteje sira-nia moris,” dehan Sekretáriu Estadu Floresta, iha nia servisu fatin, Caicoli, Díli.
Nia hatutan, parte governu liuhusi Diresaun Jerál Floresta servisu hamutuk ho autoridade lokal sira hodi halo sensiblizasaun ba komunidade sira atu nune’e bele prevene atividade ilegal ne’ebé komunidade halo liuliu oho animál fuik sira.
Nia salienta, ba komunidade sira ne’ebé ba kaer balada fuik sira hanesan kaka-tua, loriku no animal sira seluk, parte korpu guarda floresta hetan sei prende, atu nune’e sira labele kaer tan balada fuir sira-ne’e.
Iha fatin ketak Diretór Agrikultura Munisípiu Viqueque, Olivio Soares Freitas hateten, komunidade sira tenke evita oho animal fuik sira, tanba ne’e hanesan riku-soin Timor-Leste nian.
“Komunidade sira tenke evita duni oho animal fuik sira, tanba ita hatene katak, ai sira ne’ebé moris iha fatin-fatin ne’e mai husi animál, bainhira animal sira-ne’e han lori ba tee entaun ai bele moris fali,” nia esplika.
Nia salienta, komunidade sira hanoin mak oho animal, maibé sira rasik lahatene katak ai sira ne’ebé agora sira uza ne’e mai husi animál.
Nia afirma, agora dadaun guarda floresta sira halo hela patrolla iha ai-laran hodi evita oho animál fuik sira ne’e.
“Ita nia guarda floresta sira agora halo hela monitorizasaun iha ai laran sira ne’e atu nune’e bele evita kasa animal fuir sira, selae tuir dalan sira ne’e ita hare komunidade sira faan meda sira ne’e tuir dalan barak los, maibe agora la iha ona,” deklara.
