Ministériu Edukasaun husu eskola sira tenke kontinua kria programa to’os eskolár nune’e sai hanesan laboratóriu ba estudante sira hodi prátika.
Ministra Edukasaun Dulce de Jesus Soares dehan, programa to’os eskolár ne’e iha kurríkulu ensinu báziku nian, tanba ne’e eskola ensinu báziku hotu tenke kria to’os eskolár iha aredór eskola nian.
“Ita husu eskola sira atu kontinua kria to’os eskolár hodi sai hanesan laboratóriu moris ba estudante sira bele aprende,” nia dehan.
Nia dehan, to’os eskolár ne’e atu kuda ai-horis, sira hanesan, ai-ata, goiava, modo balun no seluk tan tuir buat ne’ebé sita iha kurríkulu ensinu báziku nian.
“Ita foti ezemplu husi eskola ensinu báziku EBF Fomento II, eskola ida-ne’e organiza di’ak tebes, tanba iha aredór eskola ne’e sira kria to’os eskolár, hodi kuda ai-horis sira,” Ministra Edukasaun Soares salienta.
Nia dehan, eskola barak mak iha razaun oin-oin hodi la prátika to’os eskolár iha aredór eskola nian.
Entretantu Koordenadór Rede Edukasaun Timor-Leste Coalition for Education (TLCE), Jose Monteiro hatete, implementasaun programa to’os eskolár ne’e iha tinan hirak liubá ne’e iha eskola balun rezultadu ne’e di’ak tebes.
“Ita haree eskola ida iha Akanunu produtu husi to’os eskolár hanesan modo sira utiliza fali ba programa merenda eskolár,” nia hatete.
Nia dehan, aleinde Akanunu iha Atauro, mós , iha eskola balun mak konsege kontribui ona produtu husi to’os eskolár ba merenda eskolár.
Aleinde ne’e nia dehan, ikus-ikus ne’e iha eskola balun de’it mak sei kontinua implementa, tanba iha bee, maibé eskola balun la realiza tanba laiha bee nune’e mós espasu.
