Ministériu Justisa kria Sentru Juvenil ho objetivu atu eduka labarik minoridade sira labele envolve an iha hahalok krime no hakribi hahalok kriminál.
Ministru Justisa, Sergio de Jesus Fernandes da Costa Hornai dehan, kria Sentru Juvenil ne’e governu tau ona osan $350.000 ba dezeñu nian no selu tékniku sira hodi halo servisu konstrusaun nian.
“Sentru Juvenil ne’e ho objetivu atu eduka ita-nia labarik minoridade sira labele envolve iha krime no hakribik hahalok kriminál, hodi prepara ba sira-nia futuru,” nia hatete.
Nia dehan, Sentru Juvenil ne’e harii iha Tibar Postu Administrativu Bazartete Munisípiu Likisa.
“Ita-nia ekipa tékniku sira koordena ho tékniku husi Ajénsia Dezenvolvimentu Nasionál (ADN) hodi kontinua projetu Sentru Juvenil ne’e,” Ministru Justisa Hornai salienta.
Nia dehan, kriasaun Sentru Juvenil ne’e mós ligadu ho Konstituisaun RDTL artigu 18 katak fó protesaun ba labarik sira-nia direitu no tuir prinsípiu internasionál tenke proteje sira hodi labele hetan responsablidade kriminál.
“Konstitusaun klaramente katak ita labele fó kastigu ba ema ne’ebé minoridade, tanba inkapasidade ba responsablidade kriminál,” nia informa.
Entretantu Deputadu António da Conceição dehan, lei la fó dalan duni ba Tribunal atu kondena labarik ho idade tinan 16 ba kraik.
“Ministériu Justisa bele haree kestaun ne’e hodi kria Sentru Juvenil ida ba labarik sira ne’ebé envolve iha krime no labele hetan kondenasaun husi Tribunal nune’e fó protesaun ba labarik sira labele envolve iha krime,” dehan nia.
Nia hatutan Sentru Juvenil ne’ebé harii importante atu muda menoridade sira ne’ebé mak komete krime.
“Lori sira ba aprende iha ne’ebá hanesan edukasaun, formasaun, tanba dalaruma mós inan-aman sira iha uma ko’alia sira la rona, entaun ba iha ne’ebá atu hadia sira, haree ba iha gravidade husi sira-nia hahalok.
Ita mós tenke haree Psikolojia labarik ne’e, envolve ba na’ok ne’e, tanba sa, ransu mak sala ka, tanba nia servisu duni mak ba na’ok ne’e ka, keta nia hetan presaun husi ema seluk,” nia salienta.
Nia informa, sentru ne’e bele haree mós aspetu Psikolojia labarik nian ne’ebé envolve krime hodi bele hatene loloos motivu husi ninia envolvimentu ne’e, liuhusi Sentru Juvenil ne’e mak bele identifika loloos kauza ba hahalok sira-ne’e no bele fó protesaun no eduka intensifiku ba labarik sira.
