Diresaun Jerál Floresta iha Sekretáriu Estadu Floresta (SEF) identifika komunidade iha munisípiu Viqueque uza kilat-manu hamutuk sanulu resin neen (16) mak hodi kasa animal fuik.
Relasiona ho asuntu ne’e, Sekretáriu Estadu Floresta Fernandinho Vieira dehan, SEF liuhusi Diresaun Jerál Floresta simu kilat-manu hamutuk 16 husi Munisípiu Viqueque.
“Depois de ha’u simu tomada de pose tinan ida ha’u simu kilat-manu barak mak mai husi Munisípiu Viqueque,” dehan SEF Vieira, iha nia servisu fatin, Caicoli, Díli.
Nia hatutan, depois hala’o enkontru ho Presidente Autoridade hamutuk ho xefe departamentu territoriál Floresta Munisípiu Viqueque sira entrega kilat-manu hamutuk 16.
“Depois ami enkontru ho Presidente Autoridade Munisípiu Viqueque no xefe departamentu territoriál Floresta Munisípiu Viqueque nian, aberta sira entrega kilat-manu hamutuk 16 iha momentu ne’ebá,” nia afirma.
Iha fatin seluk Diretór Agrikultura Munisípiu Viqueque, Olibio Soares Freitas hateten, loos duni Gurda Floresta prende kilat-manu hamutuk 16 iha Munisípiu Viqueque.
“Loos duni foin lalais ita-nia Guarda Floresta prende ona komunidade sira ne’ebé uza kilat-manu hodi kasa animal fuik hamutuk 16 iha Munisipiu Viqueque no kilat sira-ne’e ita enterga ona ba iha Diresaun Jerál Floresta hodi hatama iha Armazen,” dehan Diretór Agrikultura Munisípiu Viqueque.
Nia hatutan, Gurda Floresta sira mós agora sei kontinua halo kontrolu ba komunidade sira iha Munisípiu Viqueque ne’ebé sei uza kilat-manu.
“Ita-nia guarda floresta sira iha ne’e halo hela kontrola ba komunidade sira ne’ebé sei nafatin uza kilat-manu, balun ita prende ona, balun mak sei subar, maibé neineik ita sei prende hotu kilat sira-ne’e,” nia afirma.
