Durante tinan 2024 Servisu Migrasaun (SM) rekolla reseitas liuhusi servisu kada loron ne’ebé sira halo hamutuk $2.173.930 (Dois Milhões Cento Setenta Três Mil Nove Centos e Trinta Dolares Americano).
Diretóra Jerál Diresaun SM, Inspetora Xefe Adelaide de Rosa hatete, reseitas ne’ebé mak rekolla ne’e husi tipu rua (2) hanesan tarefas ba vistu no aplikasaun koima ba sidadaun estranjeiru sira ne’ebé mak viola vistu.
Nia dehan, husi tarifas ba vistu hamutuk $1.800,260 (um miliaun oito centus kutru mil dujentus e sessenta dolares) no reseitas husi aplikasaun koima hamutuk $359, 670 (trezentus sinquenta Novi mil sesentus e setenta dólares).
“Iha tinan 2024 ne’e servisu migrasaun rekolla reseitas hamutuk $2.173.930 (dois milhões sentu setenta três mil Novi sentus e trinta dólares americano),” Diretóra Jerál SM Inspektora Xefi Rosa hatete.
Nia informa, komparasaun reseitas durante tinan tolu nia laran Servisu Migrasaun koleta iha 2022 ($1.6 milhões) 2023 ($2.0 milhõens), tinan 2024 ($ 2.1 miloens), husi reseitas hirak ne’e mak kontribui ona ba kofre estadu nian
“Ba futuru Servisu Migrasaun sei mellora di’ak liutan atendementu iha postu fronteira sira nomós kapasita membru sira ne’ebé mak hala’o sira-nia funsaun iha terenu atu nune’e bele halo sira-nia servisu,” nia informa.
Entretantu Deputadu António da Conceição, dehan, kada tinan servisu migrasaun hatama reseitas ba kofre estadu ne’e montante ne’e bo’ot tebes.
“Ita haree sira hatama reseitas boot tebes, governu mós tenke fasilita sira ekipamentu modernu sira hodi bele apoiu sira-nia servisu iha postu fronteira sira,” nia saliente.
Alende ne’e nia mós husu atu kontinua halo servisu ho profesionál hodi kontrola movimentu ema tama no sai husi fronteira ho di’ak.
