Sekretáriu Estadu Floresta (SEF), Fernandino Vieira da Costa husu komunidade sira atu labele tesi ai arbiru, bainhira la iha autorizasaun husi parte governu.
Nia dehan, komunidade sira ne’ebé tesi ai arbiru, tenke para ona no la bele tesi tan, tanba liuhusi tesi ai bele fó impaktu boot ba rai.
“Komunidade sira ne’ebé tesi ai arbiru sein koñesimentu husi parte governu ne’e tenke para ona, tanba liuhusi tesi ai arbiru ne’e bele fó impaktu boot ba ita-nia rai, hanesan mosu degradasaun, mosu erosaun, sedimentasaun depois mosu dezastre naturais ne’ebé mak akontese iha tempu udan,” dehan Sekretariadu Floresta, iha nia servisu fatin, Caicoli, Díli.
Nia hatutan, husi parte Floresta nian kontinua hala’o sensibilizasaun ba komunidade sira ho objetivu atu sira bele hapara ona atividade tesi ai, hodi nune’e sira iha konsiénsia oinsá atu kuidadu ambiente atu nune’e labele fó impaktu ba sira.
“Ami kontinua halo sensiblizasaun ba komunidade ho objetivu atu sira bele hapara ona atividade tesi ai sira-ne’e, tanba ne’e liuhusi sensibilizasaun sira-ne’e bele ajuda komunidade sira atu kuidadu sira-nia ambiente,” nia esplika.
Nia salienta, ba komunidade sira ne’ebé la kumpri hodi kontinua tesi ai mak parte governu sei halo atuasaun ou prende ai sira-nia no prosesu tuir lei.
“Komunidade sira ne’ebé nafatin tesi ai parte governu sei halo atuasaun no prende ai sira-ne’e, ho objetivu atu fó hanoin ba sira atu labele kontinua tesi tan no ai sira ne’ebé governu prende sei lori ba tau iha armajen hodi halo prosesu tuir lei,” nia afirma.
Diretora Agrikultura Munisípiu Ainaro, Aguida Judit Mendonça hateten, sira halo sensibilizasaun ba komunidade sira atu oinsá labele tesi ai arbiru.
“Ami halo hela sensibilizasaun ba komunidade atu labele tesi ai arbiru, tanba ita hatene katak, bainhira ita tesi ai no la iha autorizasaun husi parte governu no autoridade lokal sira ita konsidera ilegál. Tanba ami sempre halo sensiblizasaun hodi fahe informasaun ba komunidade sira,” dehan Diretora Agrikultura Munisípiu Ainaro.
Nia hatutan, sensibilizasaun kontinua la’o, maibé komunidade balun kontinu tesi ai arbiru hodi halo to’os.
“Ami kontinua halo sensiblizasaun ba komunidade sira, maibé ita hatene katak, komunidade sira iha moris ho Agrikultór, tanba ne’e hakarak ka lakohi sira tenke tesi ai hodi halo to’os,” nia esplika.
Nia salienta, maské nune’e Autoridade Munisipiu Ainaro sempre fó hanoin ba komunidade sira atu labele kontinua tesi ai.
