Ministru Agrikultura Pekuária Peska no Floresta (MAPPF) Marcos da Cruz konsidera estranjeiru sira mai halo to’os no natar ida-ne’e la’os atu hamate agrikultór lokál sira, maibé ne’e kompetisaun ida ho to’os no natar na’in sira.
“Ema estranjeiru sira mai halo to’os halo natar kuda modo ida-ne’e la hamate agrikultór lokal sira. Ida ne’e hanesan kompetisaun ida, tanba ne’e mak ita husu ba komunidade sira ba halo to’os no halo natar depois mak governu bele ajuda fahe traktor no makina sira seluk ba sira,” dehan Ministru Marcos iha salaun MAPPF, Comoro, Díli.
Nia dehan, agora dadaun presiza produsaun rai laran, tanba ne’e se de’it mak halo to’os, halo natar no kuda modo, governu sei organiza sira tantu estranjeiru no agrikultór lokal sira hotu.
“Ita presiza mak produsaun. Ita-nia produsaun la iha, tanba ne’e mak ema mai hanesan Xina sira hakarak mai investe hodi nia osan, ha’u hanoin ida ne’e la iha problema no la hamate agrikultor lokal sira,” nia esplika.
Nia husu ba agrikultór sira se agora ema seluk bele halo to’os, halo natar, kuda modo, maibé agrikultór lokal sira lakohi book an entaun ema seluk halao nafatin.
“Husu atu agrikultór sira atu book an ba halo to’os, halo natar depois mak governu fasilita ekipamentu ba hodi ajuda,” dehan nia.
Iha fatin seluk, Xefe Suku Bahalarawain, Postu Administrativu Viqueque, Munisípiu Viqueque Angelo Pinto hateten, iha Buicarin mós Xina sira balun ba halo ona to’os kuda batar, kuda modo, hakiak fahi no karau.
“Xina balun iha Suku Buicarin ne’e balun halo to’os no kuda batar, kuda modo, hakiak fahi no karau, tanba ita rai-na’in lakohi ona halo to’os entaun husik ema Xina sira mak halo to’os depois mak ita ba hola fali,” dehan Xefe Suku.
Nia dehan, komunidade sira agora lakohi ona halo to’os, sira ba buka osan depois lori hola deit foos karon ida ba han.
“Ita-nia Komunidade sira iha ne’e lakohi ona halo to’os, sira agora bisnis de’it ona. Hola foos karon ida ba han tiha loos ona, sira lakohi halo ona to’os, tanba husik Xina sira halo to’os ba para ita hola fali sira- nia produsaun,” nia akresenta.
