Polisia Komunitaria (POLKOM) Nasional hala’o programa vizita uma ba uma komunidade nian iha suku Kaikoli, distritu Dili.
Xefe Departamentu POLKOM, Adjuntu Helena Das Dores Alves, hateten objektivu husi programa ne’e mak sosiliza informasaun kona ba oinsa atu halo prevensaun hodi evita konflitu no fo informasaun ba komunidade para labele involve an iha homoris ne’ebe provoka situasaun.
“Agora dadaun ne’e grupu illegal barak, ita presiza informa ba komunidades, labele rona rumoris sira ne’e hodi involve grupu tun sa’e,” Adjuntu Alves hateten, iha Kaikoli, Dili.
Nia hateten, programa ne’e hala’o husi ekipa departamentu polisiamentu komunitaria nasional no mos kolabora ho ekipa polisia komonitaria distritu Dili.
Nia dehan, program ne’e rasik hahu hala’o ona iha distritu 13, kada komando distrital idak-idak organiza membru polisia komunitaria hodi realize programa ne’e.
“Dili nian komesa husi Kaikoli no sei ba fali suku seluk,” nia hateten.
Entretantu Deputadu Inacio Moreira, apoia tebes programa ne’e no hetan duni konesementu husi Parlamentu Nasional no Ministeriu Defeza Seguransa.
“Loke komunidade nia konesementu hodi labele mete iha rumoris no ba aktu ne’ebe atu destroy fali nasaun ida ne’e,” Deputadu Moreira hateten.
Deputadu ne’e hateten, iha duni rumoris no asaun balun ne’ebe koko atu estraga estabilidade nasaun ida ne’e, e espera katak liu husi programa ne’e bele ajuda loke povu nia hanoin, katak agora la’os ona tempu hodi involve iha buat ne’ebe ikus mai la fo vantagen.
Entretantu komunidade Kaikoli, Manuel Ximenes, dehan program ne’e diak duni, maibe tenke implementa barak liu ba joven sira, presiza organiza ho diak liu tan ba future.
