Prezidente Komisaun Funsaun Publika, Komisariu Liborio Pereira hateten, estatutu funsaun publiku bandu maka’as funsiunariu publiku atu involve direita no indireita ba negosiu ka empreza privadas ruma tanba funsionario tenke servisu ba estadu.
Komisariu Pereira esplika, iha artigu 10 Lei Funsaun Publiku, koalia kona ba konflitu interese, katak funsiunariu publiku labele involve direita iha empreza privadas balun hodi hetan projeitu husi governu, nune’e mos uza kargu tulun hela membru familia ne’ebe kaer kompania.
“Funsiunariu ne’ebe ativu hela maibe iha kompania (loke kompania) diak liu hili sai husi funsionario publiku atu konsentra iha kompania, labele halo servisu rua dala ida,” Prezidente Komisaun Funsaun Publiku (KFP), Pereira, iha Dili.
Komisariu Pereira ameasa katak, bainhira identifika funsiunariu publiku balun involve iha negosiu ruma, maka KFP sei foti sansaun indisiplinar ka hasai sira husi funsiunariu publiku, involve an iha kompania tanba ne’e regras, tenke kumpri.
Nia konfesa katak, durante ne’e sira simu informasaun barak husi komunidades katak funsiunariu publiku, balun involve direita iha empreza.
“Akontese ona iha funsiunariu ida mak ami halo demisaun tiha ona tanba involve direita iha kompania, manan lesuk projeitu PDD,” Komisariu KFP ne’e dehan.
Entretantu Deputadu Arao Noe de Jesus, konkorda ho sansaun ne’ebe funsaun publiku foti, funsiunariu publiku tenke halo servisu interese estadu nian, la’os individu ka grupu balun deit.
Kona ba konflitu interese, nia dehan Parlamentu Nasional sei esforsu maka’as hodi hare esbosu lei deklarasaun riku soin, nune’e membru governu sira mos bele deklara sira nia riku soin bainhira tama iha membrus do governu.
“Bainhira titular hela, labele kaer tan empreza ruma atu salva guarda buat ida konflitu interese,” Deputado Noe katak.
