Membru Parlamentu Nasional kestiona kona ba obra ne’ebe maka halo durante ne’e, tanba 50% laiha kualidade.
Membru Komisaun E (infraestrutura, transporte no komunikasoens),Deputadu Inacio Moreira hateten, obra hirak ne’e identifika laiha kualidade hafoin komisaun ba halo fiskalizasaun kona ba projetu fisiku iha distritu lima hanesan distritu Bobonaro, Ermera, Oe-Cusse, Viqueque no distritu Suai.
“Hanesan iha distritu Suai, agora dadaun abondonadu no estrada iha Oe-Leu iha Bobonaro halo tinan bai-loro mak iha fatin deit, la tau alkatraun to’o agora estrada ne’e abandonadu, ne’e ita atu koalia saida tan,” Deputadu Inacio Moreira hateten, iha Parlamentu Nasional.
Deputadu Moreira hatutan, problema hanesan akontese mos estrada Hatulia, iha distritu Ermera, ne’ebe halo tinan tolu ona maibe seidauk hotu.
“Ne’ebe iha ami nia fiskalizasaun ne’e, ami deskobre katak dalan ne’ebe maka halo no la halo ne’e, hanesan deit, estrada nia kondisaun at hela, ne’e mak problema,” Deputadu Moreira lamenta.
Enkuantu iha distritu Oe-cusse, nia dehan, ne’e hamosu konfuzaun bo’ot, maske halo Estrada iha fatin rua (iha sidade laran no ida iha Oe-Silo-ba Tonin to’o Pasabe), ho kilometru 8 hanesan, maibe alokasaun orsamentu la hanesan.
“Iha sidade laran aloka $5.500, iha fali Oesilo ba Tonin to’o Pasabe orsamentu tau $1,500 deit. Tau alkatraun, halo saluran, moru protesaun halo ho osan ne’ebe ki’ik, ne’e mak konfuzaun bo’ot baa mi,” Deputadu Moreira preokupa.
Entretantu Sekretariu Estadu Obras Publiku (SEOP), Luis Vaz Rodrigues hateten, ne’e projetu uluk nian (governu anterior), barak mak laiha kualidade.
“Maibe kuandu halo iha hau nia tempu ne’e, mak projetu laiha kualidade, ami sei la halo pagamentu,” SE Rodrigues dehan.
Kona ba projetu sira ne’ebe maka paradu, nia hatutan, tanba dala ruma material maka mai tarde.
Iha parte seluk komunidade Maria Fernandes sujere ba governu, atu halo kontrolasaun ba projetu hirak ne’ebe iha, nune’e kompania sir abele halo ho kualidade.
