Prosesu atu halo estensaun ba merkadu Manleu ne’ebe governu planea ona, tuir Ministru Komersiu Industria no Ambiente, Antonio da Conceicao katak agora iha ona prosesu nia laran.
Ministru da Conceicao dehan, presiza duni halo estensaun ba merkadu ne’e maibe antes ne’e tenke hare uluk kondisaun iha fatin ne’eba nian.
“Atu halo estensaun ba merkadu Manleu mais sei hare ba liberta rai iha moru nia kotuk ba, e depois sei halo asaun integradu ida entre Ministeriu Transportes,Teras Propriedade ho Ministeriu Komersiu Industria no Ambiente ,” Ministru Antonio da Conceicao dehan, iha Fomento Mandarin, Dili.
Tuir nia, alem de ne’e, presiza mos halo terminal ida iha ne’eba, nune’e bele akomoda transportes publiku, liu-liu husi foho mai bele para iha terminal ne’e.
Nia dehan, ministeriu rua halo tiha ona koordenasaun kona ba planu halo terminal ne’e.
“Iha rai hektares rua, maibe ida ne’e integradu presiza loke terminal ida iha neba uluk para fasilita sira asesu ba merkadu ninian,” Ministru da Conceicao katak.
Entretantu Deputadu Manuel da Costa Guteres hateten, Parlamentu Nasional aprova tiha ona orsamentu ba estensaun merkadu ne’e.
“Orsamentu hira, hau ladun hatene maibe orsamentu ne’e atu halo preparasaun ba fasilidades iha merkadu laran,” Deputadu Guteres dehan.
Entretandu Mirando da Costa ,negosiante iha Merkadu Manleu konfesa katak,,fasilidades iha merkadu Manleu durante ne’e la kompletu.
“Bee moos no eletrisidade iha merkadu ne’e laiha,”negosiante da Costa dehan.
Alem de ne’e, nia hatutan, merkadu Manleu ladun estratejia tanba durante sira fa’an, sira nia sasan (modo) barak mak sai dodok tanba ema ladun sosa. “Tanba ema la to’o iha merkadu ne’e,” nia dehan.
Tanba ne’e, nia husu ba governu tenke muda hotu negosiante sira ne’ebe durante ne’e fa’an iha dalan ninin sira iha bairo-bairo, nune’e ema hotu bele konsentra iha merkadu Manleu.
“Sira balun kontinua fa’an iha merkadu Comoro no balun sei fa’an iha dala-dalan sira ne’e mak halo dalaruma ema la to’o iha merkadu ne’eba,” nia preokupa.
Iha sorin seluk Jestor Merkadu Administrasaun Distritu Dili,Bonifacio Soares, hateten kona ba negosiante sira iha merkadu Comoro, ne’e kompetensia Ministeriu Komersiu Indutria no Ambiente (MKIA) nian.
“Kuandu muda hotu negosiantes ba iha merkadu Manleu, fatin la sufsiente,tan ne’e ami intrega fila-fali ba komersiu mak hanoin atu halo nusa, halo luan tan merkadu ga oinsa,” Jestor Soares katak.
Nia hatutan, atividade iha merkadu Manleu la’o hanesan bai-bain maibe barak liu mak obralan. “Produtu lokal balun labele ba iha ne’eba, tanba komprador sira la ba iha ne’eba,” Jestor Soares katak.
