Estrada dirasaun Dili ba Distritu Liquisa sei halo rehabilitasaun iha tinan 2013 ne’e, tanba ne’e Ministeriu Obras Publiku asina ona akordu ho Kompania Sao Jose husi Espanha hodi kaer obra ne’e.
Sekretariu Estadu Obras Publiku (SEOP), Luis Vaz Rodrigues hateten, estrada husi Dili ba Liquisa kontratu asinadu ona entre governu ho kompania husi Espanha (Sao Jose).
“Total orsamentu ne’ebe maka atu halo obra ne’e hamutuk $20 milioens I tal ne’ebe maka impresta husi ADB,” dehan Sekretariu Estadu Luis Vas Rodrigues, foin lalais, iha Mandarin, Dili.
Nia hatutan, estrada ne’e nia luan 28 kilo metro no durasaun ba obra ne’ebe to’o tinan 2015.
“Fiar katak, sira sei halo ho kualidade tanba ami hateten kedas ba sira katak, orsamentu ba halo estrada ne’e bo’ot tebes, ne’e duni tenke halo ho kualidade duni,” Sekretariu Estadu Rodrigues esperansa.
Kompania Sao Jose nia afirma, tuir duni prosesu tenderizasaun hanesan prosesu normal iha minsteriu ne’e nia laran.
Iha parte seluk Deputada Josefa Alvares Soares hateten, halo kontratu ho kompania husi rai liur atu halo obra iha ne’e diak maibe tenke hare didiak atu nune’e bele halo ho kualidade.
“Governu presiza halo kontrolu ne’ebe maka masimu atu nune’e obra sira ne’e bele la’o ho diak no kontroladu,” sujere Deputada Soares.
Tanba tuir nia, dala barak obra ne’e halo maibe falta de kontrolu husi governu entaun obra balun halo la ho kualidade ne’ebe maka diak no fakar osan saugati deit.
