Asosiasaun Jornalista Timor-Leste rekomenda ba Sekretariu Estadu Komunikasaun Sosial no ekipa lima atu aumenta artigu ida iha Lei Komunikasaun Sosial kona ba fo pena ba ema ne’ebe taka informasaun ba media.
Tuir Prezidente Asosiasaun Jornalista Timor-Leste (AJTL), Tito Filipe katak, iha esbosu Lei Komunikasaun Sosial (KOMSOS) husi artigu ida to’o 24 la koalia espesifiku kona ba oinsa mak bele fo protesaun ba media,liu-liu ba jornalista sira.
“Ami hakarak atu ema sé de’it maka tenta atu limita jornalista sira ne’e, tenke fo ponisaun, ezemplu iha Ministeriu Saúde sira fo despaixu ida atu proivi funsionariu sira labele koalia ho media ida, ne’e kontra ona liberdade media no liberdade espresaun,” dehan Prezidente AJTL, Tito Filipe, (09/05), iha Kaikoli, Dili.
Nia rekonese katak,ministru iha autoridade politiku atu bele manda nia funsionariu sira,mas staf sira mos presiza espresa sira nia vizaun no hanoin no labele limita tanba ne’e garante tiha ona iha artigu 40 no 41 Konstituisaun RDTL.
“Tanba ne’e maka ita hakarak prefere iha Lei Komunikasaun Sosiál ne’e tentative ba liberdade imprensa no liberdade espresaun punivel tenke fo pena ba sira ne’ebé maka halo tentativa,” Pezidente AJTL ne’e sujere.
Alem de ne’e , nia observa katak, lei ne’e la espesifiku nafatin atu fo protesaun maibe barak liu fo regularizasaun, e nasaun hanesan Timor-Leste ne’ebé postu konflitu no nasaun demoktrátiku, presiza lei ida ne’ebé espesifiku, fo valor bo’ot liu ba liberdade imprensa no liberdade espresaun.
Entretantu Sekertariu Estadu Komunikasaun Sosiál (SEKOMS), Nelio Isaac hateten, aumenta artigu ida ba artigu ida, ne’e la’os kestaun maibe problema maka wainhira kria artigu ida halo fali konfuzaun.
“Ita loke artigu ida tenke iha razaun fundamentais, tenke iha kaitan mos ho artigu sira seluk, la’os tur tur ita hanoin depois ita loke hodi halo konfuzaun ba buat hotu, ha’u hakarak fo hanoin ba kolega sira hotu katak alem de Lei Komunikasaun Sosial, iha mos lei Kodigu Penal ne’ebé vigora tiha, tanba ne’e ita tenke kompriende katak lei komunikasaun social ne’e labele sees husi ita nia konstituisaun rasik,” katak SE Isaac.
