Membru Parlamentu sujere ba governu atu toma atensaun ba problemas falta transporte iha Tribunal Distrital Suai, atu nune’e bele fasilita servisu judisiariu sira nian iha ne’eba ho diak liu tan.
Deputada Albina Marcal hateten, transporte nudar fator importante atu bele fasilita servisu la’o diak, ne’e duni governu tenke iha hanoin oinsa para bele tau kareta ne’ebe maka sufsiente ba sira.
“Presiza iha kareta ne’ebe maka sufsiente atu nune’e sira bele halo atendementu judisiariu ho diak iha tribuanal ne’eba,” dehan Deputada Albina Marcal, foin lalais, iha Parlamentu Nasional.
Deputada ne’e mos sujere ba Tribunal Distrital Suai (TDS) atu halo proposta ida ba iha governu, nune’e sir abele tau matan ba kestaun ne’e.
Iha fatin seluk Ofisiais Justisa Tribunal Rekursu, Jose Ximenes rekonese katak, tribunal distritais sira menus transporte maibe sira labele halo buat ida tanba governu fo deit kareta hat.
“Ami hetan deit kareta UN nian hat deit husi governu, rua fob a juis nain rua no rua seluk oferese ba administrasaun nian, ne’ebe ami la fahe fali ba iha tribunal distrital sira,” tenik Ofisiais Justisa ne’e.
Nia dehan, agora dadaun kareta ne’ebe maka iha hela Tribunal Distrital Suai hamutuk hat, no iha Tribunal Distrital Baucau (TDB) hamutuk lima.
“Maibe ne’e la to’o tanba kareta sira ne’e oferese ba juis sira deit, kona ba operasional dala ruma juis sira maka fo fali sira nia kareta ne’e ba ofisiais sira atu ba halo fotocopy ruma no seluk tan,” katak Ofisiaia Justisa Tribunal Rekursu ne’e.
