Planu governu atu estabelese Postu Registu Moris iha Sentru Saude tolu ne’ebe identifika ona, agora dadaun sei hein hela apoia husi agensia internasional Unicef nian tanba governu laiha orsamentu.
Diretor Registu Sivil no Notariado Distritu Dili (DRSNDD), Vitor da Costa Neto hateten, sira sei estabelese Postu Registu Moris (PRM) iha Sentru Saude Formoza (SSF), Becora (SSB)no Sentru Saude Comoro (SSC), tanba sira ne’e mak iha sala maternidade durante ne’e.
Nia hatutan, atu fo atendementu registu sivil ba bebe sira ne’ebe moris iha sala maternidade Sentru Saude sira ne’e nudar direitu fundamental ida.
“Ami laiha fundus ne’ebe proprio, tanba ne’e ami hein ajudus husi organizasaun internasionais Unicef atu apoia ami halo servisu,” dehan Diretor Neto, foin lalais, iha Kaikoli, Dili.
Diretor Neto dehan, sira halo ona akordu iha kedas 2007 ho Unicef kona ba planu ne’e no durante ne’e konsege ona estabelese Postu Registu Moris (PRM) lima iha iha HNGV no Ospital Referal sira.
Nia hatutan, Unicef nudar agensia ne’ebe tau matan ba labarik Timor-Leste, ne’ebe mos nudar membru Konselhu Direitus Humanus iha direitu atu hetan apoia finanseirus husi organizasaun sira ne’e atu promove direitu labarik.
Tuir estatistika ne’ebe DRSNDD iha, durante tinan 2012 liu husi Postu Registu Moris iha HNGV konsege registu labarik hamutuk nain 1,117.
Iha parte seluk, Ministru Justisa, Dionizio Babo hateten, Ministeriu Justisa hamutuk ho Ministeriu Saude estabelese PRM iha sentru saude sira balun inklui HNGV hodi fo atendimentu registu ba labarik sira nudar direitu fundamental ne’ebe hakerek iha Konvensaun Direitu Labarik ne’ebe estado Timor –Leste ratifika ona.
“Diresaun registu sivil notariado la’o ona iha Ospital Referral hotu iha teritorio laran no to’o ona iha sentru saude sira atu fo treinamentu ba parteiras sira hodi fo atendimentu ba labarik sira bainhira moris mai,” dehan Ministru Babo.
Alem de fo treinamentu ba parteiras sira , nia dehan diresaun ne’e mos fo ona treinamentu ba lideransa lokal sira iha area remotas atu fasilita bebe sira ne’ebe moris iha uma hodi asesu ba dokumentus legal sira hanesan sertidaun RDTL no seluk tan. *
