Iha tomada de pose, Prokuradoria Distrital Dili, Angelina Saldanha hateten, iha nia mandatu durante tinan hat ne’e nia sei foka liu ba kazu droga no korupsaun ne’ebe dadaun ne’e komesa buras iha rai laran.
Tuir Prokuradoria Angelina Saldanha katak, droga no korupsaun nudar asuntu prioridade ne’ebe mak importante tebes atu tau matan.
“Hau sei hare ba iha kazu krimi droga, korupsaun no krimi violensia domestika tanba hau hare iha estatistika iha PDD kazu sira ne’e komesa atu buras,” dehan Prokuradoria Distrital Dili, Angelina Saldanha, foin lalais, iha Tribunal Distrital Dili.
Nia hatutan, atu kombate droga no korupsaun, sira sei kolabora ho Polisia Nasional Timor-Leste (PNTL) no Komisaun Anti Korupsaun (KAK).
“Kona ba violensia domestika presiza liu husi meius ne’ebe maka legal no medida de prevensaun tanba ne’e sei husu tulun husi NGO sira hanesan FOKUPERS, JSMP, sei bele mos Igreja Katolika tanba liu husi esplikasaun bele mos redus krimi violensia domestika,” tenik Prokuradoria Saldanha.
Iha parte seluk Deputada Ilda da Conceicao, apoia programa hirak ne’ebe maka Prokuradoria Saldanha sei halo durante iha nia mandate.
“Programa no inisiativa ne’ebe kapas tebes, ita hein katak buat hotu-hotu bele la’o ho diak no susesu,” Deputada ne’e esperansa.
Nia dehan, atu kombate droga, korupsaun no violensia domestika iha rai laran, presiza esforsu no kolaborasaun ne’ebe diak ho entidade relevante hotu.
