Desde uluk to’o agora moras TBC kontinua rejistu aas iha Klinika Bairo-Pite kompara ho moras sira seluk e durante fulan Abril nia laran iha pasiente nain sanulu resin mak baixa iha klinika ne’e.
Diretor Klinika Bairo-Pite (KBP), Doutor Daniel Murphy hateten, iha fulan Abril nia laran moras TBC afeta maka’as ba iha feto Timor sira.
“Agora dadaun iha TBC nain sanulu resin maka baixa hela iha sala TBC nian, kompara iha fulan hirak liu ba, ema barak ha’u atende maibe sira simu aimoruk ba hemu durante fulan sia, sira bele passa.” Dehan Doutor Daniel Murphy, foin lalais, iha Bairo-Pite, Dili.
Doutor Dan esplika, moras TBC iha oin rua; maka formonál (liu husi mear) no ekstra formonál, ekstra formonál ne’e isin sira ne’e hotu ho moras TBC deit.
“Ohin ha’u konsulta hetan feto ida moras TBC husi kotuk ne’e nakonu ho moras TBC, isin sira hotu TBC, ne’e kazu ida ke triste los no agora baixa iha sala TBC nian, ami sei fo aimoruk ba nia to’o nia moras ne’e di’ak maka bele fila ba uma,” Doutór Dan dehan.
Entretantu Pasiente TBC husi distritu Liquisa ne’ebe mai halo tratamentu iha KBP, Gabriela da Silva hateten,antes ne’e nia hala’o ona konsulta iha Liquisa durante fulan tolu maibe nia rasik la hatene nia moras.
“Ha’u konsulta deit iha Liquisa,liu husi programa SISKA, maibe sira la fo hatene ha’u nia moras ne’e, ha’u nia moras maka lor-loron mear hela deit, tan ne’e ohin sira haruka ha’u mai iha kliníka ne’e hodi halo tratamentu di’ak liu ba ha’u nia moras,” dehan Gabriela.
Nia esperansa katak, ho mai halo tratamentu iha KBP nia bele hatene nia moras no enfermeiru sira bele fo nia aimoruk tuir nia moras, nune’e nia moras ne’e bele diak lalais.
