Membru Parlamentu Nasional sujere ba governu atu fo apoia ba familia matebian bolseiru Elidio dos Reis ne’ebe mate iha Portugal hodi lori nia isin mate mai Timor-Leste.
Prezidenti Komisaun F (Edukasaun,Saude,Kultura no Veteranus no Igualidade Jeneru), Deputadu Virgilio da Costa Hornai hateten, estadu iha obrigasaun atu fasilita matebian nia familia oinsa bele lori mate isin mai Timor-Leste tuir uzu kustume tradisonal .
“Importante liu mak governu tenke fo apoiu ba familia matebian ninian para transporta mate isin mai Timor,” tenik Prezidente Komisaun F, Virgilio da Costa Hornai, iha Parlamentu Nasional.
Kona ba atu halo investigasaun ba kazu ida ne’e, nia dehan ne’e la’os estrainu ida hodi foti kestaun maibe iha Polisia para atu halo investigasaun ba motive husi kazu ne’e no mos iha medika forensic nian hodi halo prosesu ba kazu ne’e.
Entretantu Deputaduhusi bankada Fretilin, Eladio Faculto dehan, nia parte seidauk hetan informasaun sobre akontesementu ne’e maibe Ministeriu Negosiu Estranjeiru nudar forsa politika hodi halo diplomasia atu hare problema hanesan ne’e.
“Ita nia embaixada iha Portugal presiza hare sidadaun Timor ne’ebe mak hela iha rai liur,sekarik mate ka hetan susar ruma iha rai liur, tenke buka hatene tuir motivu, nia mate tanba moras ou mate tanba kondisaun fiziku,” dehan membru Komisaun F ne’e.
Iha sorin seluk Vise Ministru Ensino Superior,Marcal Avelino Ximenes katak,adidu sei trata hela dokumentus atu lori matebian mai Timor-leste hodi halo seremonia funeral.
“Nia kala moras mental oituan iha ne’eba,iha informasaun katak nia alin uluk mate nia la hare,” dehan Vise Ximenes.
Maske nune’e nia dehan, nia parte seidauk hatene loos motive husi matebian nia mate hodi soe an iha uma andar hat nia leten.
Enkuantu bolseiru ne’e ho naran kompletu Elidio dos Reis, antes ba estudu iha Portugal hasai maestradu nian (S2), nia dosente iha Fundasaun Kristal, hanorin lisaun kimia.
