Maske nune’e Diretor Daniel Murphy dehan, sira esforsu oinsa atu bele atende inan sira ne’e.
“ Iha ne’e ami hasoru problema ba fatin maibe ami nia parteira sira iha ne’e servisu rotasi, ne’ebé inan sira mai loron ga kalan mos ami sempre fo atende sira ho di’ak,” dehan Doutor Daniel Murphy, Diretor Klinika Bairo-Pite (KBP), foin lalais,iha Bairo-Pite, Dili.
Nia hatutan, durante iha fulan Marsu, iha semana rua nia laran, sira konsege fo atende ba inan nain 61 no sira partus ho kondisaun ne’ebe diak hotu.
Iha fatin hanesan, Parteira Maria Beatriz Exposto hateten maternidade KBP iha sala partus ida deit maka sira uza lor-loron no liu tiha oras rua maka sira muda fali ba sala nifas.
“ Ami iha ne’e sala naran nifas ne’e khusus ba sira ne’ebé maka partus tiha ona,ami nia sala nifas rua, wainhira sira partus tiha sira hein durante 24 oras iha ne’e depois doutor mai haree tiha sira foin bele fila ba uma,” informa Parteira Exposto.
Nia hatutan, lor-loron sira sempre hetan pasienta nain lima ba leten, dala ruma mos balun mai ho kalan,kuandu kama iha nifas la to’o maka sira buka meius hare fali kama moras seluk nian mamuk entaun transfere sira ba kama ne’ebé maka ema la uza.
“ Ami la baruk no la kolen tanba hanesan parteira pronto atu fó atendementu iha kualker oras no tempu,” tenik Parteira ne’e.
Parteira ne’e mos husu ba governu atu hare oinsa mak bele resolve menus fatin ba inan sira atu partus.
Entretantu inan ne’ebé maka partus iha KBP, Bendita Freitas rekonese katak kama ba inan no oan iha klínika ne’e la sufisiente maibe atendementu Parteira sira iha klinika ne’e diak.
“Ha’u kontenti los mai partus iha klinika ne’e tanba parteira sira fo atende ami ho di’ak los, maske ha’u rona katak ita foin oan primeiru ne’e susar atu partus maibe ha’u partus ho normal deit,”dehan Inan Bendita.
Tanba ne’e nia fo agradese tebes ba parteira sira iha KBP tanba wainhira inan isin rua mai barak los fatin la to’o mos parteira sira maka halai ba mai hodi buka fatin ba sira.
