Estudante terseiru ano Margarida Correia sente triste tanba loron Segunda (18/03) nudar loron ezame primeira periodu ba eskola hotu ne’ebe lolos hotu-hotu hakmatek hodi tuir izame maibe iha sira nia eskola hamosu fali problema entre estudante ho estudante.
“Ha’u triste los ba iha loron ne’e,tanba momentu ami tama ba sala laran hodi simu papel atu hala’o ami nia ezame maibe mosu fali problema iha ami nia eskola tan deit papel ne’ebé maka professor sira fahe mai ami, la to’o ba ami estudante sira katak balu deit maka hetan no balun la hetan tan ne’e ami nia maluk sira baku malu iha sala laran,” diskontente Estudante Margarida Correia, foin lalais, iha Becora, Dili.
Nia dehan, kada fulan estudantes hotu tenke hatama dollar hat ($4,00) ba administrasaun eskola nian maibe la hatene tanba saida mak papel izame la to’o fali.
Maske nune’e nia dehan, problema baku malu entre estudante sira ne’e konsege resolve duni husi sira nia profesores sira, no izame kontinua la’o. “Mas ami nia kolega balun ne’ebe la hetan materia izame, sira hakerek rasik deit,” dehan Estudante Correia.
Hatan ba kestaun ne’e Vise Diretor Jeral Eskola Nobel da Paz, Lourenco Ximenes katak problema materia izame la to’o tanba estudante balun la aktivu iha aula aprendisazen tan ne’e professor sira foto kopi maka ba sira ne’ebé maka aktivu liu iha aula aprendisajen.
“ Ami nia problema ne’e la bo’ot ida tan ne’e ami konsege rezolve tiha no estudante sira kontinua hala’o izame ho normal e to’o ohin loron laiha problema,” tenik DJ. Ximenes.
Nia hatutan estudante sira ne’ebé maka hamosu problema ne’e sira identifika ona katak estudante nain tolu maka hamosu tan ne’e professor sira sei bolu sira nain tolu no inan, aman depois de izame remata.
“ Ami lakohi fo sansaun agora kedas ba sira nain tolu tanba ami hakarak sira hala’o nafatin izame tanba bainhira ami fo sansaun agora kedas maka ami impata fali sira nia future,” dehan DJ. Ximenes.
Entretantu membru Komisaun F (edukasaun, saude, kultura, veteranus no igualidade jeneru), Deputadu Eladio Fakulto husu ba Ministeriu Edukasaun atu hare problema ne’e.
“Ha’u triste loos wainhira rona problema ne’e, tanba ne’e ha’u husu mos ba professor sira ne’ebé maka eskola refere buka meius halo nusa para akontesimentu ne’e la bele akontese tan iha loron seluk, tanba iha meius barak maka ita bele uza hodi prepara papel izame ba estudante sira,”dehan Deputadu Faculto.
