Xefe Sentru Saude Formoza (SSF), Jaime dos Reis hateten kuaze loron-loron sira simu pasiente ho moras diarea iha sentru ne’e.
“Ami fó tratamentu hanesan bain-bain no fó aimoruk, kuandu grave liu ami haruka ba iha Ospitál Nasionál Guido Valadares tanbá laiha fatin atu baixa,” informa Xefe Sentru Saude Formoza, Jaime dos Reis, iha Bairo Formoza, Dili.
Nia dehan, pasiente sira ne’e mai husi Distritu Dili husi Sub-distritu, Kristu Rei, Vera Crus, Nain Feto no Sub-distritu Dom Aleixo.
Tuir xefi SSF katak hahan hotu-hotu ne’ebé mak han tenke prepara tuir nutrisaun ne’ebé mak iha ho vitamina par bele di’ak ba ema nia isin.
Nia esplika, sintomas husi moras diárea mak tee been loos de’it liu dala tolu, tanba ne’e husu ba komunidade sira atu moris tuir saúde públiku nian.
Moras diarea mos fasil da’et ba ema seluk tanba ne’e komunidade sira tenke hatoman an antes prepara hahan tenke fase liman ho sabaun, hamoos haris fatin, kuidadu labarik sira inklui loron ida tenke haris dala tolu.
Iha fatin seluk Prezidenti Komisaun F (saúde, edukasaun, kultura, veteranus no igualidade jéneru), Deputadu Virgilio da Costa Hornai katak moras ne’e nia frekuénsia mosu maka’as bainhira tempu udan, liu-liu bainhira saneamentu familiár ne’e la’o ladun diak.
Tanba tuir nia, koñesementu sosiedade kona ba oinsa mak moris hijieniku ne’e seidauk sufsiente e dalabarak inan sira fó hahan ba sira nia oan sira sein fase sira nia liman,
“Primeiru ita nia konesementu moris saudavél ne’e seidauk iha, segundu diárea mosu ne’e tanbá deit situasaun natureza,” tenik Deputadu Hornai.
Nia mos husu ba Ministériu Saúde atu halo sosializasaun informasaun ba moras hotu-hotu ne’ebé mosu tan de’it falta prevensaun husi família no sensibilzasaun sosiedade nian, oinsá atu proteje ou hado’ok aan husi moras.
